Al rive Suns Europe 2025

Al mancje pôc a Suns Europe 2025. La gnove edizion dal festival european des arts tes lenghis minorizadis, inmaneât de cooperative Informazione Friulana, cul jutori finanziari de Regjon autonome Friûl-VJ, de ARLeF, dal Comune di Udin e di altris sogjents publics e privâts di chenti e di fûr, si davuelzarà ator pal Friûl dai 27 di Novembar ai 6 di Dicembar. Ancje par chest an la rassegne e met dongje une schirie di events, tra incuintris, concierts, spetacui teatrâi e fintremai apontaments di divulgazion e di aprofondiment tematic in cont di dirits linguistics, promozion dal teritori, dialic interculturâl e citadinance europeane.
◆ La manifestazion e à vût za un pâr di anteprimis, che a son stadis inmaneadis vie pal mês di Otubar a Codroip in colaborazion cul Premi leterari San Simon, e si conferme tant che une ocasion par dâ spazi ae produzion artistiche e culturâl plui inovative intes lenghis minorizadis di dut il continent. Si vûl puartâ la Europe in Friûl e il Friûl in Europe e soredut fâ indenant une vision diferente de Europe e dal mont, fondade sul pluralisim linguistic e culturâl in dutis lis sôs dimensions, lant daûr de esperience disvilupade in chest cjamp de bande di Radio Onde Furlane e dal sproc che al compagne il festival di cuant che al è nassût, dîs agns indaûr: «Dirit ae lenghe, dirit ae diversitât».
◆ Intal cartelon di Suns Europe 2025 a son trê apontaments cul cine: la prime vision assolude di ‘Natisa’ dal furlan Stefano Giacomuzzi, la proiezion di ‘Kneecap’, il documentari par gaelic irlandês di Rich Peppiatt, che al à cjapât diviers premis ator pal mont e che al conte la storie dai Kneecap, innomenât grup di rappers di Belfast, e la tornade sui schermis di ‘U Mohicano’ del regjist cors Frédéric Farrucci.
◆ La sezion dedicade ae leterature e varà tant che protagoniscj Stiefin Morat, Suso de Toro, Ibai Atutxa e Laia Perearnau, in rapresentance de scriture creative par furlan, par galizian, par basc e par catalan.
◆ Daûr di chê che je la tradizion di Suns Europe a saran soredut tancj i apontaments cu la musiche, tacant dai concierts che si fasaran a San Vît dal Tiliment, ai 28 di Novembar li dal circul Arci CRAL ‘Ciliti’, cun Maddi, Alffa e Claudio Banelli, a Cormons, li di Gradnik, la dì dopo cun Maddi, Alffa e Alvise Nodale, e a Udin e Codroip, ai 4 e ai 5 di Dicembar, cui musiciscj che a saran protagoniscj de serade finâl di sabide ai 6.
◆ Juste in chê dì il festival al cjatarà la sô cjase a Udin li dal Teatron. Vie pe buinore al sarà Scuele Europe, conference-spetacul dedicade al pluralisim linguistic tant che patrimoni, dirit e oportunitât, cu la partecipazion dai students des scuelis secondariis, di diviers artiscj e di altris esperts. Dopodimisdì, tal Ridot dal ‘Giovanni da Udine’ al vignarà metût in sene ‘Tant che Tupamaros’, leture seniche musicade des contis di Paolo Patui par cure di Massimo Somaglino cun Alessio Zoratto e Luca Colussi. Tal conciert finâl, che al siere il concors internazionâl che al à tirât dongje passe nonante candidaturis di dute la Europe, si podaran viodi e scoltâ i siet artiscj selezionâts, tra cjançon di autôr, rock, pop, eletroniche, sperimentazion e fintremai epic metal: la catalane Lia Sampai, la galese Mali Hâf, il faroês Marius Ziska, i ladins Popcorner, i sarts Shardana, la basche Verde Prato e il progjet furlan nassût dal incuintri jenfri il rapper Passion e i punk rockers No Good.
Dutis lis informazions in detai si cjatin sul sît web dal festival ae direzion www.sunseurope.com . ❚