Al è impuartant jessi neutrâi… dut il rest al conte pôc

Tant par visâsi: intai agns Cincuante la vuere frede in Coree e svicinà il mont a une gnove vuere mondiâl. In Europe, là che i aleâts americans e la Union Sovietiche si cjatarin un cuintri di chê altre, si sbrenà la pôre di une vuere atomiche. I rus a cirivin di impedî la integrazion de Gjermanie intal Ovest e ancje il tentatîf de Ongjarie di sfrancjâsi dal imperi sovietic al fo sdramassât. Inte Europe dal dì di vuê, invezit, la vuere frede viere e je deventade storie. Dal pont di viste dai numars, e je la Union Europeane a paronâ, cun 450 milions di abitants e il plui grant marcjât interni dal mont: pûr e je dome un mieç di passaç intai grancj conflits gjeopolitics. Intant la Russie e sta puartant indevant une vuere cuintri de Ucraine, biel che fabrichis di “troll” digjitâi a destabilizin lis democraziis liberâls. Ma a son soredut i Stâts Unîts de Americhe che a vuelin ritirâsi di buride de politiche e de sigurece europeanis.
◆ Il tratât austriac al è un fi dai agns Cincuante. Al vignì firmât za fa 70 agns di USA, Union Sovietiche, Gran Bretagne e France, i cuatri vincidôrs de seconde vuere mondiâl. Pûr di tornâ a un stât sovran, la Austrie e acetà la neutralitât, tant che e veve pretindût la Union Sovietiche, e le metè in vore cuntune leç costituzionâl dal 1955. E fasè buinis lis regulis di difindi cun fuarce la neutralitât, di no acetâ aleancis militârs e di no dâ acet trupis forestis tal so teritori. Nuie di mancul ma, soredut, nuie di plui.
◆ Intai decenis dopo, chest al puartà bogns servizis diplomatics e Viene e deventà impuartant pe politiche internazionâl. Cun dut achel, dopo 70 agns la neutralitât e ven viodude in mût cetant critic. Cun di fat, al jere facil restâ neutrâi cuant che lis vueris a stavin lontanis de Europe. Cu la jentrade inte UE intal 1995 a cambiarin cetantis robis, e la vuere de Russie e je stade la gote che e à fat stranfâ il cit. Par chest la Svezie e la Finlande si son zontadis ae NATO. Ancje se i esperts a considerin di fat sorpassade la neutralitât, la Austrie e refude un dibatiment uficiâl. L’ex president Heinz Fischer (SPÖ) al à vût dit, za fa pôc timp, che la neutralitât e protêç plui che no 5000 soldâts americans sul teritori. Un grum di austriacs, stant a un scandai dal 2024, a son convints che la neutralitât no ju protezedi avonde. Ma la maiorance no je disponibile a difindi la Austrie cu lis armis, ni a mandâ militârs in cualchi altri paîs de UE; cun di plui doi austriacs su trê a viodin la Europe dal dut dipendente dai USA tant che sigurece politiche. La stesse maiorance e vûl dut câs continuâ a mantignî la neutralitât.
Di chest garbui di opinions al è dificil che si disvilupedi une strategjie di sigurece ben clare.
◆ Dut câs intal dibatiment ferbint su chest cantin, une robe e je clare: la Austrie e à za cjapât posizion. E reste neutrâl dal pont di viste militâr, ancje se al è clâr che nol è cussì pe politiche. Za di agns di fat la Austrie e va in missions di pâs de ONU e, tant che altris stâts europeans, e je part di altris conseis di colaborazion militâr. E à ancje une rapresentance li de NATO a Bruxelles. La adesion ae UE di trente agns indaûr e à infuartît i leams cu la comunitât internazionâl. Ancje inte vuere jenfri Russie e Ucraine la neutralitât e reste su la cjarte se la Austrie e poie sanzions e e contribuìs al fonts pe pâs, si ben che cu la clausule di no mandâ armis mortifaris. No lasse che trupis forestis a restin sul teritori, ma e permet il passaç di traspuarts e svoi militârs de NATO.
◆ Si domandisi par altri cemût meti in vore la clausule di assistence de UE, che e fâs bon l’intervent di ducj i paîs membris in câs di atac a un dai stâts stes. La Austrie si spiete chest jutori di bande di altris ma, se si tratàs di intervignî intun altri paîs, e vûl fâ valê la neutralitât. Cuant che si tabaie di coerence!
◆ La situazion mondiâl in gjenerâl e chê europeane in particolâr e je cetant cambiade intai ultins decenis, e aromai nissun Stât, neutrâl o no, al podarà fa fente che lis menacis mondiâls no lu rivuardedin.. ❚