AI 32 DI MAI. Bestiari da lis fiestis di paîs

Al è rivât l’Istât: la stagjon dal mâr, dal cjalt, da lis feriis. Pai furlans, ancje che da lis sagris.
Une tradizion che in Friûl e va indevant cence mai une crisi, parcè che la sagre e je l’habitat naturâl dal furlan, e une risierve naturâl di esemplârs che a jessin dal letarc dome in chel moment dal an. Ve chi un piçul bestiari des sagris di paîs.
Chel che al jes dome cuant che je la sagre. Par lui la sagre e je l’event mondan plui impuartant di ducj, anzit, l’unic. Tu lu ricognossis parcè che par vignî a la sagre si met simpri il vistît di fieste, chel plui elegant e a la mode. Dome che la mode e je ancjemò chê di cuant che al jessive dut l’an di sabide di sere, cussì tu lu viodis cui bregons a çate di elefant o, se e je une femine, cul vistît di paillettes.
Chel che nol jes nancje pe sagre. Tal sens che al va a mangjâ a la sagre, ma vistût come se al fos a cjase sô, in tute e cu lis çavatis intor.
Il balerin. Par dut l’an nissun lu viôt: al passe dut il timp a alenâsi ta lis discotechis di slis, dome par fâ biele figure a la sagre. Nol mangje, nol bêf, nol petece. Al sta dome a zirevoltâ sù e jù pe piste di bal. Se tu âs voie di fevelâ cun lui, tu âs di spietâ che la sô compagne di bal e vadi vie (parcè che si sa, ogni biel bal al stufe) e scomençâ a zirevoltâ cun lui.
Il zuiadôr di pescje. Par dut l’an nol cjôl nancje un grate e vinç, forsit ta la sô vite nol à mai comprât nancje un biliet de loterie, ma cuant che al vierç il barachin de pescje, no tu lu distachis di li. Tai agns, si è puartât a cjase cualchi centenâr di disgotepaste, vincj-trente pietins, une cincuantine di pastei par colorâ e doimil picjots par meti a suiâ, ma une dì o chê altre rivarà finalmentri a cjapâ ancje la biciclete!
Ma soredut, ta lis sagris a saltin fûr i grops da lis sagris! Probabilmentri ibernâts ta chei altris moments dal an, cu la lôr musiche che nissun nol scolte fûr da lis fiestis di paîs (ma ta lis fiestis, bot e sclop e torne di mode), i grops da lis sagris a àn simpri nons cu la “&” par someâ plui modernis: Toni & i sunadôrs, Bepo & la sô bande, Jacum & i zeis, Brovade & i musets, Mangjâ & murî.
Une faune che e merete di jessi protete, cuintri des leçs che cu la burocrazie a metin in zonoglon chescj events, come che al è sucedût a Buje. Anzit: forsit o podaressin ancje meti sù une associazion par salvâlis: il WWF, Vive Vive lis fiestis!
BETE DI SPERE