Interviste a al professôr di Nimis, za president e segretari
dal Moviment Friûl, motôr e ideadôr di tantis istancis e iniziativis pe valorizazion de lenghe e dal popul furlan.
«Il gno prin riferiment? Pre Checo Placerean»
«Adrian Cescje al è nassût a Nimis ai 4 di Setembar 1948, e li al è a stâ. Al à studiât a Padue Filosofie, li che si è laureât. Al à insegnât in putropis scuelis dal Friûl e par sedis agns tal Liceu sientific N. Copernic di Udin. Al è stât militant dal Moviment Friûl de fin dai agns ‘60, par trê agns president e un an segretari. Si è dedicât di simpri ae cause dal Friûl». Chest profîl, che al struche ben la figure di Cescje, si pues lei te introduzion dal so libri «Memoriis di politiche linguistiche» publicât intal 2014 (ed. KappaVu) che al fâs passe 500 pagjinis. Tantis, al vignarès di dî, ma a àn dentri dut chel al à fat pal Friûl, fra lis tantis jessi motôr e ideadôr de Leç Regjonâl pal furlan 15/96 e dal Grant Dizionari Bilengâl talian furlan.
_
Adrian, cemût jerie la tô Nimis di frut? In ce ambient sêstu cressût, o imagjini che si fevelàs furlan dapardut?
Sì, disìn cussì passe pal novante par cent. Nome a cualchidun, par fâ un esempli i fîs dai mestris, ur fevelavin par talian. Gno pari, che al jere mestri, e al à insegnât a Nimis, invezit al à vût chê di trasmetimi, cun mê mari, la lenghe furlane. E chest par me al è za stât un segnâl. Mi à fat capî la impuartance de identitât linguistiche. Ancje par contrast rispiet a chei altris mestris che si diseve, furlans ancje lôr.
_
Par solit o domandi se al è un episodi che al à fat vê cussience de lenghe e dal popul furlan, ma si pues dî che tu mi âs za rispuindût: za to pari te à mote.
Chest al è l’episodi fondamentâl. Man a man che o cressevi, cheste cussience istintive e deventave cussience razionâl e o tindevi a valorizâ la lenghe, par esempli cirint di scrivile come che o podevi. E o cirivi di difindile cuant che o pensavi che no jere valorizade. Chest za tes scuelis elementârs o mezanis e po dopo al Liceu Classic «Stellini» di Udin. Propit al Stellini o ai vût la fortune di vê di insegnant pre Checo Placerean. A scuele si limitave a butâ li cualchi idee furlaniste, par esempli al diseve che al jere daûr a voltâ i Vanzelis. Ma dopo o ai vût mût di frecuentâlu fûr di scuele, par esempli pes bataiis par vê la facoltât di Medisine a Udin. Ve, si pues dî che lui al è stât il gno ispiradôr, e mestri, de cussience furlaniste plui razionâl e madure. Al è lui che mi à fat scuvierzi Marchet, Pasolini, e ducj chei altris autôrs che o ignoravi in maniere complete.
_
Cuâi sono i inteletuâi furlaniscj plui impuartants?
Tai agns ’50-‘60 la Scuele Libare Furlane di pre Meni Zannier, che e pandeve une vision plui dignitose dal furlan rispiet a chê de Filologjiche. E jere simpri une concezion rurâl ma plui autentiche rispiet a une cierte retoriche “çorutiane”. Chei a son stâts i prins vêrs mestris, i prins a tentâ di fâ sù une culture serie. Po dopo chei dal grup leterari Risultive: Riedo Puppo (Pup), Dino Virgili, Otmar Muzzolini (Meni Ucel), Lelo Cjanton e altris. Lôr a àn cirût di creâ une rêt par contrastâ la concezion passatiste e folkloriche di popul furlan cirint di meti in pratiche il miôr di chel che al veve sugjerît Pasolini te sô Academiuta. Tai stes timps Etelredo Pascolo e altris a metin dongje la redazion di Int Furlane, un gjornâl scrit par furlan che in chê volte e jere une robe scuasit scandalose. Di chescj e je vignude fûr la mê formazion.
_
E cuâi sono i mestris pe leterature. Cui consearessistu di lei?
Alore… lassìn pierdi la poesie che e je dute une cuistion a part. Se un al ves di imparâ il furlan cu la sô ricjece lessicâl de vite normâl, i mestris a son Dino Virgili e pre Bepo Marchet, in assolût i miôr. Po dopo Riedo Pup, pre Pieri Londar e pre Meni Zannier pai articui su Int Furlane. Ducj però a àn il difiet che cuant che a àn bisugne di une peraule impegnade o plui moderne, te metin in forme talianade. Fale Marchet, no àn une dissipline filologjiche suficiente.
Pe prose ancje i articui di pre Meni Zannier, che al jere soredut poete, e chei di pre Checo.
Par vignî a agns plui resints, dai ‘80 indevant, pre Toni Beline.
_
Isal ancje alc di plui classic che si podarès conseâ?
Ermes di Colorêt (1622-1692) o Pieri Çorut (1792-1867) a àn un vocabolari e un lessic straordenari, ma cul lôr regjistri: une lenghe e je fate di plui regjistris, no dome chel umoristic o folkloristic. Al è ancje il regjistri tecnic, politic, parfin burocratic. Il sfuarç che o vin fat nô tai agns ‘70 al è stât chel di meti a disposizion de lenghe furlane ducj i regjistris, par esempli par fevelâ ancje di fisiche e di matematiche.
_
Un concet rivoluzionari.
Sì, prin di dut o vin tacât a meti la cuistion politiche de lenghe tal Moviment Friûl. Pai vecjos aderents nol jere un teme impuartant, e fasevin lis riunions par talian. I zovins tant che jo, Zorç Ius e altris, e fra chescj il stes pre Checo, o tacarin a tontonâ i vecjos su la cuistion. Di lôr, Gianni Nazzi al è stât un di chei che si è convint e nus à dât une man a fâlu deventâ un teme impuartant. Di li e je tacade la politiche linguistiche fate dopo tai agns.
_
Mi fasistu nons di cualchi mestri politic? E une curiositât che mi ven dal to percors: par te la ideologjie di çampe vegnie prin dal furlanisim?
No, propit no. Ognidun al à la so ideologjie, ancje chei che a disin di no vêle. Inte mê ideologjie la idee de justizie sociâl che cumò si clame “di çampe” no je mai stade separade de idee nazionalistiche identitarie furlane. Anzit, il gno probleme al è simpri stât chel di fâ capî ancje ae çampe di sposâ la cause furlaniste. Lizzero e Baracet (politics dal PCI, ndr) a àn sposât la cause furlane parcè che al è stât il Moviment Friûl a puartâ indenant la cuistion politiche de identitât e de lenghe. Se tu mi domandis di dî un non di mestri politic, o torni a nomenâ pre Checo Placerean.
_
Pardabon? Nol jere un progressist. Daûr des ideis che tu mi âs contât no crodevi che tu mi fasessis il so non…
Intant al jere il gno professôr di religjon e fondadôr dal Moviment Friûl. Jo o soi jentrât subit di zovenut tal MF e li cun pre Checo si sin batûts, o vin fat cunvignis, bataiis politichis come chê pe Universitât dal Friûl. Tal stes timp o jeri a studiâ a Padue, tal ‘68, e al è clâr che lis ideis dal ‘68 lis ai assorbidis. Il gno probleme al jere cjatâ la sintesi tra il gno jessi furlan e lis ideis di riforme sociâl. Però al è pre Checo il gno riferiment politic.
_
Cambiìn argoment, varessistu cualchi non di citâ tal cjamp de musiche?
No ai rivât a seguî il filon de musiche cjantade par furlan dai ultins agns, pûr pensant che al è stât significatîf e impuartant, propit come incressite de culture. O ai miôr no dî nuie par no dî monadis, duncje. Tai ricuarts o ai lis musichis di Oreste Rosso, atîf tai agns ‘70 e ‘80. Un predi musicist che al à musicat lis robis plui bielis che tu sintis cumò in glesie par furlan. E je une musiche liturgjiche, di Glesie, ma tal stes timp e je une musiche che tu le sintis propit furlane.
_
Ultime domande, un autôr o opare che par te al varès di jessi valutât di plui.
Jo o volarès che «L’aghe dapit la cleve» di Dino Virgili al fos tornât a publicâ in grafie juste e fat cognossi ai zovins. Par fâur viodi ce che e jere la realtât furlane intun timp li che la culture e jere dutun cu la lenghe. Clâr, compagnade di coments scrits, parcè che chel mont nol è plui e spiegâ lis sôs pecjis come la sô bielece. E varès di jessi une opare di riferiment tant che une nestre Iliade o Odissee, di vêle sui bancs dai nestris fruts. Une opare di ricjece linguistiche cussì grande che cui che le lei le assorbìs, e la lenghe e torne a vivi. ❚
…………………………………………………………
FOCUS. Il personaç
Oreste Rosso
(Martignà 1911 – Udin 2001)
Nassût a Martignà, al è stât ordenât predi intal 1935. Al è stât un grant animadôr e divulgadôr de musiche, convint des sô impuartance pe formazion culturâl e spirituâl. Par chest e je stade grande ancje la sô opare di compositôr, svariade e leade ae sô tiere e ae sô int, tant di meretâsi l’apelatîf di «cjantôr de anime furlane».
◆ Nus à lassât plui di tresinte composizions intun stîl personâl, pôc academic. Fra chestis, une trentine a son messis. Tantis lis composizions in musiche profane dispès su lirichis di autôrs furlans impuartants tant che Novella Cantarutti, Guido Michelutti, Federico Fruch; su YouTube si pues cjatâ Suspir da l’anime o Anin a Betlem. A son numerosis lis sôs armonizazions di temis popolârs furlans, roseans, istrians e slovens. Al à componût ancje une trentine di tocs par fruts.
Al à vût il premi Nadâl furlan intal 1987. ❚