A Tumieç, un contentin pal tribunâl

“Il Tribunâl che ducj a volevin salvâ”, a titolavin su pe Patrie di Setembar dal 2013. A son passâts doi agns di cuant che i uficis judiziaris di Tumieç a son stâts sierâts par vie de riforme de ex ministre Severino che e à riorganizade la gjeografie dai tribunâi in Italie, e ce isal sucedût? Lis promessis che di mês in mês a rivavin di un grum di politics no son dal sigûr stadis mantignudis, pues crodi. Masse pîts di pescjâ, masse pocje fuarce di tratative a nivel roman. E, in fin dai conts, par Udin al va ben cussì.
JUSTE UN ALC
Alc però, par dî la veretât, al è stât fat. In gracie di un acuardi tra la presidente de regjon Serracchiani e il ministri de justizie Andrea Orlando, ae presince dal sindic di Tumieç Brollo, si è rivâts a otignî tes setemanis passadis l’impegn a vierzi un Sportel di prossimitât pes pratichis judiziariis tai uficis dulà che a cjatavin spazi magjistrâts e avocats. La Regjon e metarà a disposizion i locâi, dulà che dopo al rivarà personâl regjonâl za comandât cul compit di dâ informazions, ricevi e trasmeti documents al Tribunâl di Udin.
IL VINARS
DES CONSULENCIS
Tal stes timp, ancje i avocats dal ex foro tumiecin si son dâts di fâ par ufrî in maniere gratuite al citadin un apontament setemanâl, il vinars, dulà che si pues cjatâ informazions par cualsisei pratiche o assistence legâl. Viodarìn se chest sportel al cjaparà pît e soredut se pardabon al sarà fat funzionâ. Intant però i disasis pe int che di dute la mont e à di rivâ jù a Udin par causis e rognis cu la justizie a continuaran… ❚
David Zanirato