Al sarà Sacîl a dâ acet, domenie ai 6 di Avrîl dal 2025, ae 48e edizion de Fieste de Patrie dal Friûl par celebrâ i 948 agns de costituzion dal Stât patriarcjâl furlan, fondât ai 3 di Avrîl dal 1077. Une sielte significative parcè che propit a Sacîl, ai 8 di Novembar dal 1366, il patriarcje Marquart di Randeck al à promulgât lis Constitutiones Patriae Fori Iulii. Une racuelte di leçs imponente che e marche trop indevant che al jere il Stât patriarcjâl in cjamp legjislatîf e che e restarà in vore in vore fint al 1797.
◆ La Fieste de Patrie dal Friûl e je inmaneade dal Comun di Sacîl, de Regjon Autonome Friûl-Vignesie Julie e de Agjenzie regjonâl pe lenghe furlane – ARLeF, in colaborazion cul Istitût Ladin Furlan “Pre Checo Placerean”.
◆ Lis celebrazions a tacaran aes 9.30 a San Durì (frazion di Sacîl) in viâl Pietro Benvenuto 1 e te Glesie di Sant Durì, aes 10, i rapresentants des trê diocesis dal Friûl a disaran Messe, cun leturis e preieris par furlan, sloven e todesc.
◆ Propit des 10 indenant al larà in onde il speciâl “Fieste de Patrie” su Telefriuli (canâl 11) che al trasmetarà in direte la liturgjie e, subit dopo, la cerimonie civîl.
Finide la messe, il corteu al rivarà fin te Loze dal Palaç Comunâl par un moment di salût a ducj i partecipants e ai citadins. Aes 11.30, tal Teatri Ruffo (plaçute Antonio Pasqual), a scomençaran lis celebrazions civîls cu la esecuzion dal Imni dal Friûl e la leture de Bole imperiâl.
◆ Par anticipâ lis celebrazions dai 6 di Avrîl, il Comun di Sacîl al à in program une schirie di events colaterâi. Tra chescj si segnale la mostre tal Palaç Ragazzoni, Stralûs. Art in Friûl 1985-2025, che si screarà vinars ai 4 di Avrîl e che e restarà vierte fin al mês di Mai.
Come ogni an, dut câs, la celebrazion de Fieste de Patrie dal Friûl e je insiorade, su dut il teritori furlan, di un calendari plen di events culturâi colaterâi, tant che spetacui teatrâi, events musicâi, presentazions di libris e tant altri. A son plui di 70 i Comuns che a àn aderît al bant pe poie aes manifestazions che a compagnin l’inovâl, promovût de ARLeF in atuazion de Leç n. 6/2015..
◆ La ocasion de Fieste de Patrie, ai 3 di Avrîl dal 2025, e puartarà a Udin pe proiezion speciâl dal docufilm “Marcho. La ultime bandiere” ancje l’innomenât medievalist Franco Cardini, che al à curât i aprofondiments storics di cheste impuartante coproduzion ARLeF e Arte Video, pe regjie di Marco Fabbro. Il film al è lât in onde in prime assolude su Rai Storia, ma ai 3 di Avrîl e sarà la pussibilitât di viodilu al Visionario cul intervent dal professôr Cardini. La storie di Marc di Murùs, l’ultin puartebandiere dal Stât patriarcjâl di Aquilee, unic a fâ cuintri ae invasion di Vignesie dal 1420, si podarà viodi su RaiPlay, a tacâ de seconde metât di Avrîl. Simpri dal mês di Avrîl, a son previodudis ator pal Friûl ancje lis proiezions risiervadis aes scuelis secondariis di I e di II grât. L’insegnament de identitât al à di scomençâ di piçui: e la Fieste de Patrie e covente ancje par chest. ❚Marcho_Fantini_Cardini_credits_C.Zorzenon
A Sacîl la Fieste de Patrie 2025: apontament ai 6 di Avrîl
Redazion