Insom dal Istât, inte frazion di Talmassons, il torneu in onôr di un dai personaçs plui preseâts dal sport de Patrie
Il Friûl al è simpri stât une tiere fertile pal sport talian, massime intal balon, contant ducj i campions che a son nassûts inte Patrie dal Friûl e che a son lâts a cjapâ sodisfazions e sucès pardut. Dome fra i balonîrs, si ricuardin Alfredo Foni di Udin, Enzo Bearzot di Dael, Dino Zoff di Marian, Fabio Capello di Pieris, Tarcisio Burgnich di Rude, Maurizio Ganz di Fusee, Fulvio Collovati di Teôr, Luigi Delneri di Aquilee, Luigi De Agostini di Tresesin. Cence contâ chei che si son metûts in evidence cul Udin: Massimo Giacomini, Fabio Rossitto, Paolo Miano. E i ultins zovins Alex Meret, Guglielmo Vicario, Bryan Cristante, Ivan Provedel, Pietro Comuzzo: e coventarès une pagjine de Patrie par citâju ducj.
◆ Inte liste, si scuen tignî bon ancje il non di Lauro Toneatto, nassût a Flambri di Talmassons, il paîs indulà che al è cressût ancje Annibale Frossi, un altri che cul balon al è deventât une vore famôs e preseât. Prime come zuiadôr e daspò come alenadôr, Toneatto al è rivât a jentrâ tal pantheon dai plui grancj personaçs dal balon in citâts une vore lontanis dal Friûl. Foggia, massime Siene, lu viodin come un mît e, passâts cuindis agns de sô muart, il non di Lauro al reste simpri ben cognossût.
◆ Ducj i agns, insom dal mês di Avost, cualchi setemane prime dal inizi dai campionâts, a Flambri si zuie un torneu metût adun dal nevôt, Roland Toneatto, avodât propit al mister. Une manifestazion sportive che e vûl meti in mostre i miôr zovins balonîrs dal Friûl de categorie under 17.
◆ Par savê cui che al jere Lauro Toneatto, si pues sintî ce che a contin di lui ator pe Italie. Il gjornalist puliês Domenico Carella al à scrit un libri intitulât “Il Foggia del sergente di ferro”, par contâ la storie de scuadre che, partide de serie B, cu la vuide di Lauro Toneatto e rivà a zuiâ in serie A cul insium dal scudet, intal 1974.Doi agns e mieç a Foggia che nissun tifôs dal sodalizi ros e neri di chê volte al pues dismenteâ.
◆ “Chê clape – al à dit Carella intun intervent pe presentazion dal Torneu dal 2025 a Flambri – e veve une soliditât e une fuarce di no crodi. In chei agns si zuiavin campionâts cun 22 scuadris e il Foggia al cjapà dome 25 goi in dut l’an. Dome 7 intes 19 partidis zuiadis in cjase. La promozion in serie A e fo consacrade a Padre Pio, ancje parcè che propit Lauro Toneatto al fasè un vôt prime di tacâ la stagjon. E si conte che il mister al le sù pes scjalis fin te glesie in zenoglon. Ai 6 di Zenâr dal 1974, il piçul Foggia al vincè cuintri il Napoli e al fo tierç in classifiche, daûr di Lazio e Juventus: nol è mai plui capitât, ancje intai agns di Zeman”.
◆ Tant dûr e intransigjent intal lavôr di alenadôr, tant plen di umanitât intal rapuart cui zuiadôrs. “Baste pensâsi – al è lât indenant Carella – che il mister al curave ducj i detais. Aes sîs di matine tu lu cjatavis za a lavorâ su la jerbe dal stadi Zaccaria. E bielzà tal martars al tacave a sustâ i zuiadôrs viers la partide de domenie. “Mai molâ!” al diseve. Ancjemò cumò ducj i zuiadôrs si ricuardin, cun terôr che diu nus vuardi, di une scjalinade che al faseve fâ in alenament, ae massime velocitât, no dome une volte, ma cetant dispès e cence fermâsi. E il biel al jere che Lauro al coreve denant di ducj, cjantant. Dut câs, al jere ancje un amì e al tirave simpri fûr cualchi idee par molâ la tension de clape di zuiadôrs. Par esempli, al menave la scuadre al cine“.
◆ Ve po trê fatarei che a spieghin miôr di dut il personaç.”A Cesena – la conte di Carella –, i dirigjents a lerin a comprâ un gjelât par dute la scuadre, une biele cope, frescje. Dome che le faserin colâ sul cjâf dal mister. E ducj a verin pôre de sô reazion. Dut câs, Lauro nol disè nuie, al le a lavâsi, par daspò fâsi viodi net, cuntune bocje ridinte. O, par cognossi Toneatto, si pues fevelâ di cuant che al zuiave di “Torello”, un mût par alenâsi a robâ la bale. Al jere dûr, al sustave ducj. Une volte, un dai zuiadôrs, lu cjapà in plen in muse. Toneatto si tirà su, cul sanc che i coreve jù pe muse, e al disè: “Anìn indenant, a cori”. E al tacà a cori ator dal cjamp di balon, denant di ducj, par un biel toc. O in chê volte che il zuiadôr Franco Liguori al le jenfri il camarin cuntune pelice di piel di lôf, comprade a Bologne. Ducj chei altris zuiadôrs a volevin vêle e a faserin une scomesse cuntun dirigjent: se a fossin rivâts a fâ risultât a Gjenue inte partide daspò di chê dì, la societât e varès vût di comprâ pelicis par ducj. Il dirigjent al acetà, sigûr che al varès vinçût la scomesse. Invezit, la scuadre e rivà a fâ risultât. Rivâts a Bologne par lâ a zuiâ la prossime partide a Verone, i zuiadôrs si meterin dacuardi par fâ vignî un garzon a puartâ lis pelicis a ducj, Dome che il dirigjent, cjapât de pôre, al comprà robe di scjarse cualitât, di bot ridicule. I zuiadôrs a meterin lis pelicis istès e cussì a lerin tal stadi. Dute la int di Verone e rideve a viodiju: “Fantats, o sin al Nord, ma no al Polo Nord!”. Dut câs, Lauro Toneatto al à tignût di cont chê pelice strambe, parcè che e jere un ricuardi cetant biel di une scuadre di amîs”.Avonde par capî parcè che al jere un sergjent di fier. “Nissun al fevele mâl di lui: al à il rispiet di ducj”, al à confermât Carella. Lauro Toneatto: un mît dal balon furlan. ❚
::::::::::::::::::::::::::::::::::::::::::::::::::::::::::::::::::::::::::::::::::
Undis edizions dal torneu: l’Udin al à il record di cuatri sucès
La prime edizion dal Memorial “Lauro Toneatto”, par iniziative di Roland Toneatto, nevôt di Lauro e ancje lui balonîr a Flambri, par tradizion di famee si zuià a Flambri intal Istât dal 2012. Di chel an e pai trê agns dilunc vie, l’Udin al à simpri vinçût. Intal 2016, il sucès al fo de Pro Gorizia, prime di dôs vitoriis di file de Manzanese.
◆ Intal 2019 il sucès al fo de Sanvitese, prime che la organizazion si fermàs par vie de emergjence dal Covid, sclopade intal 2020.
◆ Cuatri agns daspò, Roland Toneatto al à tacât une gnove stagjon dal torneu, cuntune formule plui vivarose e simpri cu la usance di clamâ lis miôr societâts di balon de regjon, almancul intal setôr dai zovins. Dal 2023 la vitorie dal Donatello e l’an daspò, intal 2024, al fo il Cjarlins Muçane a puartâ a cjase il trofeu, cul sucès in finâl cuintri la Manzanese.
◆ Chest an, la prime volte dal Fontanefrede, bon di vinci la ultime partide, ai 12 di Setembar, cuintri il Donatello, cuntun gol segnât dibot intal ultin minût. ❚
:::::::::::::::::::::::::::::::::::::::::::::::::::::::::::::::::::::::::::::
DI ZUIADÔR A ALENADÔR,
SÙ E JÙ PE ITALIE, CU LA FAMEE
IN TOSCANE E IL CÛR IN FRIÛL
Lauro Toneatto al nassè a Flambri di Talmassons intal mês di Zenâr dal 1933. Daspò vê tacât cu la scuadre dal paîs di frutut, al fo professionist massime cun Empoli e Siene. In Toscane al fo une grande bandiere, tant che a Siene lu calcolin ancjemò cumò tant che un dai zuiadôrs plui rapresentatîfs dal sodalizi, cun plui di dusinte presincis. Di alenadôr al tacà di Siene une cariere lungje plui di 25 agns ator pe Italie. Bari, Pisa, Foggia, Arezzo, Cagliari, San Benedet, Sampdorie, Pistoie, Taranto, Reggiana, Ternana, Rondinella e il Genziano di Rome lis societâts indulà che al à lavorâ come tecnic.
◆ Tantis lis notis di croniche che a son ladis daûr di lui. Intal 1966 al è stât nomenât miôr alenadôr de serie C – un premi de Federcalcio – cuant che al à puartât il Bari de tierce serie ae serie A. Intal 1969 al veve di lâ al Turin e al lassà il Bari, ma la operazion no le indenant e al scugnì molâ la intenzion di tornâ indaûr al Bari, parcè che in Pulie a vevin bielzà clamât tal so puest il mister Oronzo Pugliese (propit chel che al à dât la ispirazion par scrivi la storie dal mitic film “L’allenatore nel pallone”, cun Lino Banfi).
◆ Intal 1979 al fo il prin alenadôr clamât dal gnûf president de Sampdorie Paolo Mantovani, in serie B: la storie de scuadre di Gjenue che intal 1991, cun Gianluca Vialli e Roberto Mancini, e vincè il scudet e scomençà propit di chê sielte.
In paîs, a Flambri, si conte che lu vevin clamât ancje ae Juventus, ma l’incuintri cun Gianpietro Boniperti, president de clape blancje e nere, nol le masse ben.
Lauro Toneatto al jere cognossût cul sorenon di “sergjent di fier” pal so mût di fâ dret e sclet, cence nissune diplomazie e la usance di lâ dibot ae sostance des robis.
◆ Daspò vê sierade la cariere di alenadôr, al restà a vivi in Toscane, dongje Siene, tignint simpri il contat cu la famee e i amîs di Flambri. Il mister al è muart intal mês di Mai dal 2010. E l’an daspò, intal 2012, a tacarin a ricuardâlu cul Memorial Toneatto, che si zuie tal stadi di Flambri, avodât a une altre glorie sportive dal paîs, Annibale Frossi, medaie di aur ae Olimpiade dal 1936 a Berlin cu la Nazionâl taliane di balon e bon di vinci scudets cu la Inter. Cun di plui, al fo ancje alenadôr e personaç une vore cognossût intal balon dai agns daspò la vuere. ❚
