EDITORIÂL – Une cuviertine par cambiâ il Friûl

Tachìn un gnûf an de Patrie, e che al sedi gnûf lu viodês de cuviertine dulà che il timp si ferme tra la modernitât de tecnologjie in medisine e la cure dal dolôr e des malatiis piturade di Otto D’Angelo. O scrivìn di sanitât in chest numar, il prin di une schirie di articui dulà che o viodarìn di rispuindi a une domande simpri plui impuartante pal nestri Friûl: ma se pardabon o fossin autonoms, in ce maniere varessino di inmaneâ la sô struture politiche e aministrative? Puedie esisti une vision furlaniste de organizazion civîl e sociâl?
Une scomesse che e va plui indenant di une inchieste gjornalistiche, parcè che nus puarte a une altre cuestion plui gjenerâl, ven a stâi il gjenar di propueste che il moviment furlan al pues presentâ a la int e, soredut, la sô credibilitât.
Intun moment di crisi come chel che a stan vivint no dome la Italie, ma dute la Europe, chei che a crodin te fuarce dal autonomisim no puedin zuiâ di rimesse, spietant che cualchidun – il guvier centrâl, i partîts talians – a dedin une rispueste.
Cheste, dut câs, e sarà di sigûr une rispueste pai lôr interès, cuntune vision simpri plui centralistiche, dulà che dome il fat di jessi minorancis, di jessi difarents, al è viodût tant che un fastidi, se no un berdei.
Alore si à di passâ aes propuestis o almancul cirî di individuâ i problemis.
No je une cuestion tecniche dulà che il professôr furlan al è plui brâf di chel toscan, ma dulà che il furlan al dovarès partî di une divierse impostazion: al prin puest no ven la economie, il marcjât, la sorevivence dal Stât, ma chê de identitât di un popul, de sô tiere, de sô storie e culture.
La scjalute dai intervents duncje no pues che jessi alternative, cemût che al è stât pal taramot.
Se e je vere che i bêçs de ricostruzion a son rivâts dal Stât talian, al è stât diviers il mût di doprâju e lis prioritâts, decidudis dal bas, de int e no dal Palaç.
Cheste e je la sfide, culturâl prime e po dopo politiche, ma soredut morâl. ■
Dree Valcic