CULTURE – LA FABRICHE DAI… LIBRIS. Carlo Tolazzi, La salamendrie tal fûc

“Il scûr al è cidin, il scûr al è frêt, il scûr al sclizze il timp ch’al passe, al è come un vuluz ch’al strenz lis robis e al scjafòe i pensîrs, inmarmulît, al secje lis ladrîs de vite il scûr, dulà ch’al jentre al creve i tiarmins, al bute jù i mûrs, nol à pês, nol è lunc, nol è larc, nol è alt, al è e vonde, eterni, crudêl ancje, parcè ch’al distude ogni ricuart, une man di scûr dapardut e no si capìs plui quant ch’al è scomenzât, s’al è scomenzât, s’al finirà une buine volte, al gjave ogni rapuart….”
Chest l’incipit de Salmandrie tal fûc, la opare di Carli Tolazzi che e à vinçût il premi S. Simon intal 1995. Se si volès seguitâ cu la citazion fin a cjatâ un pont, si varès di lâ in devant ancjemò scuasi vincj riis…E za chest nus dîs la ande inovative di chest libri, che al riclame, par esempli, i romançs inglês di une Virginie Wolf, cu la sô stream of consciousness  (il flus de cosience) o il Sartre dai Chemins de la liberté. Une prose dute interiôr, anarchiche, sicu che al è anarchic il pinsîr dal om. Ma Tolazzi al sa ancje doprâ une prose plui tradizionâl, furnint al letôr descrizions detaiadis di une stanzie, di une strade, di acjadiment.
La conte si disvilupe in trê moments difarents de storie dal Friûl e e salte di un timp in chel altri, obleant il letôr a tignî daûr intal stes timp ai trê nivei. Ma il teme al è un sôl, in fin dai fats: la matetât cjanine dal om, che al rive a discjadenâ i siei instints plui bas par fâi cuintri al nemì. Che nol à nancje une intenzion di sedi nemì, al è dome difarent. Une puare femine violentade e devente une strie di scugnî deliberâsi di jê. Une frute çambarlane (o strumire?) che i à restât dome un gjatut a volêi un tic di ben e va eliminade par vie che e je çambarlane (o strumire?). Un frutat che al à la piel scurute al è il diviers e no si pues ricognossilu tant che un di nô.
Dute storie. E no dome dal timp passât, ma ancje storie di vuê (l’omicidi di Giacomo Valent al è dal 1985: dome che al sucedè al mês di Lui, no di Carnevâl). E storie che e fâs pensâ. E leint lis ultimis paginis no si pues no preseâ la cifare stilistiche di alt nivel di cheste leterature, ma no si pues nancje fâ fente di nuie, pensâ che a sedin robis che no nus rivuardin. Lis ultimis cuatri riis a son une biele sberle inte muse: “…jo no sai se la mê a jè scalogne o se culì, ta cheste Patrie salde oneste e lavoradore, la pôre dal diviars a jè passade di un secul a chel altri cence mai vuastâsi, tanche la salmandrie tal fûc”.
PS: Il libri si pues cjatâ ancje in Rêt, baste fracâ su chest link http://www.friul.net/e_libris/La%20salmandrie%20tal%20fuc.pdf
Laurin Zuan Nardin