IL FERÂL. Aquilee: sagre dai popui

La ocasion uficiâl e jere di ricuardâ i 16 secui dal prin Concili di Aquilee (381) e i 6 secui de muart dal grant legjisladôr Marquart di Randeck, patriarcje de Patrie (1381). Ma la int e je vignude, o crodìn, par altris conts. Parcè che Aquilee, centenaris o no centenaris, e clame, e la int si sint di cjase, a cjase.
Il spetacul de Basiliche incolme, il sflandôr e la solenitât des ceremoniis e dai vescui e predis concelebrants, il cjant che te sô semplicitât e coralitât ti faseve vignî i sgrisui, sintî a preâ e a cjantâ in cuatri lenghis e capî che si è fradis cun dutis lis stangjis che o vin dulintor, la sagre de grande place, la ligrie di int diferent che si sint di vê une lidrîs cumuniâl no parturide des fantasimis di un mat o de prepotence di un trist ma scaturide dal grim de storie, di chest cjanton-crosere de Europe. […]
Il vescul di Augsburc, l’arcivescul di Lubiane, i vescui de regjon furlane e di Triest nus àn dât un spieli di ce che e je stade la nestre Glesie Patriarcjâl: moment di union, element di coesion, risultive di armonie e di convivence che culì, te crosere, e veve dutis lis resons par deventa impussibil.
Il vescul Stimpfle, bavarês, al à batût afuart su la Europe dai popui, che se no je Europe ancje dai popui piçui e je dome une conclave di Stâts fuarts par scjafoiâ miôr i debui.
In merit de fieste di sant Ermacure, o podìn strucâ chest:
– l’avôt dal Friûl la int lu sint te anime e al cjaparà simpri plui pît. La strade e je juste;
– la armonie, la amicizie e la clime di fradis a saltin fûr bessolis, tun mût che al è un spetacul;
– i cjants, ben direzûts e tignûts sù dai cinc coros, a àn fat tornâ a cerçâ il savôr de anime furlane. […]
– i vescui, dal 76, no àn vut il coragjo di vignî. Cheste volte a àn cirût di comedâ la falope, ancje se il celebrant principâl al à talianât sù une predicje universâl tipo «Apemaia». Ma la int ur perdone, se le àn capide di stâ cun nô;
– il sindic di Aquilee al à di lassâ dutis lis bandieris, ancje chê di chel popul che lui, a cjacare, al dîs di difindi: Lôr a son pe difese globâl, e alore ur pâr di vê dirit di scjafoiâ i segns «parziâi», sicu la bandiere dal Friûl; […]
Insome, in barbe a ducj i basoâi e i profetis di sventure, il Friûl al torne a ripiâ il so snait e la sô gole di vivi e di florî. Ancje in gracie di chei sants Ermacure e Furtunât che par prins a àn imbombât cul lôr sanc cheste tiere.
La Patrie dal Friûl n. 7-8 Lui – Avost dal 1980
PRE ANTONI BELINE