ATUALITÂT – Vignît a cene…

Vignît a cene/fradis cun me … l’invît di spartîsi la Cene Eucaristiche al vignive cjantât cun dolcece dal coro Vôs di Vilegnove, e al jere rivolzût a une sdrume di int di dutis lis fatis, int vignude di ogni bande dal mont a fâ visite al centri de Cristianitât, la glesie di Sant Pieri a Rome, vie pe Messe dal dì de Sense celebrade sul altâr Maiôr, chel sot dal Spirtu Sant.
DUT MASSE GRANT_ Jentrâ in chê basiliche al vûl dî sintîsi sfracaiâts da la potence di une religjon che alì e pant dut il so podê: dut grant, dut sflandorôs, dut in mostre tant che intun marcjât. Un dai coriscj al à cisicât, intal mieç de confusion di int in rie che e leve a tocjâ une tombe: “Se o torni achì o riscji di pierdi la fede”.
Alì drenti, di fat, si respire plui il cult dai papis, che no chel di un Diu che al vûl sei onorât no tant de imponence dai monuments, ma pluitost da la condivision di vite cui puars de tiere intal rispiet di cualsisei popul. Alc dal gjenar si lu spietave, naturâl.
CLAMÂTS A ROME_ Cuant che al è rivât l’invît di lâ a cjantâ a Rome, inte basiliche di Sant Pieri, la decision dai coriscj di Vilegnove di San Denêl e fo unanim, partint naturalmentri dal so diretôr, pre Roman Michelot: o sin onorâts, o larìn, ma alì o puartarìn la nestre lenghe e la nestre culture musicâl.
Cheste sielte no dome par une volontât di dâ un piçul sburt cuintri la uniformitât che e somee, in ducj i setôrs e, magari cussì no, ancje inte glesie, l’unic obietîf di puartâ indenant ore presint, ma ancje par fâ un bon servizi a di chei che e saressin stâts alì a scoltâ. La idee e jere di fâur sintî une vôs diferente, une vôs di un popul che al è stât bon di laudâ e di preâ tant che a Rome, cun lis sôs peraulis, intun cjantonut di glesie che no je stade sterpe intal produsi sants e musiciscj cu la sô specialitât.
IL REPERTORI PAR FURLAN E LATIN_Lis cjantis sieltis a forin par furlan, ma ancje par latin, in chel latin che al jere la lenghe universâl, ma che al podeve sei metût in musichis diferentis seont la culture di ducj i popui. Il coro al à sielzût di fâ scoltâ in chê fate soredut lis musichis di doi grancj autôrs, tra i plui impuartants dal moviment cecilian di rinovament de musiche liturgjiche intal votcent, ma mai considerâts a Rome. O pensìn che pre Tite Candotti e Jacopo Tomadini si vedin consolâts là sù, intal Paradîs dai musicants, a sintî lis lôr composizions finalmentri onoradis là che a varessin vût di onorâlis une vore di timp indaûr.
PARTICOLÂR CHE AL DEVENTE UNIVERSÂL_ Ma a la fin la sensazion plui grande no je stade dome la sodisfazion pe vê mostrade la schene drete di un popul puar che al dopre cence pôre la sô lenghe par cjantâ in face a la capitâl dal catolicisim mondial: e je stade soredut chê di viodi la int di ogni fate, colôr, etât e mût di fevelâ, che si faseve indenant sot la cupule di Sant Pieri, par acetâ chel invît de cjante: La vôs che us clame vuê/fradis scoltaitle… e di sintîsi fradis cun lôr.
Meracul de musiche! In chel moment si à capît ce che e je la vere unitât: no jessi part di une glesie di int fate cul stamp, ma intal puartâ, ognun cun la sô identitât, intal non e a pro dai valôrs di dute la umanitât, a la stesse risultive.
Marc Pascolini