CULTURE – ART-Â. Il mont rurâl di Gianenrico Vendramin a Spilimberc

Fotograf par passion, Gianenrico Vendramin (Sant Vît dal Tiliment 1929 – 2008) al à produsût in trente agns di vore un font documentâl pardabon impuartant relatîf al mont contadin furlan, massime a chel di Sant Vît dal Tiliment e de Basse furlane, documentant dut il cicli dal cavalîr e il stîl di vite te campagne. Al è lui l’autôr di scuasi dutis lis fotografiis dal Museu de civiltât contadine di Sant Vît.
Vendramin al à cjalât prime cun pazience e po, ritrat la autenticitât dal paisaç rurâl, la operositât dai braçs che a lavorin, consacrâts ae agriculture. Cumò, il Craf, il Centri di ricercje e archiviazion de fotografie, e propon une selezion des sôs imagjins che e conte la vite contadine, lis lavorazions diferentis des materiis primis e, duncje, i prodots de tiere furlane, e che e ven esponude in ocasion da “Lis placis dal Bio” a Spilimberc, in vie Cisternini, fin ai prins di Jugn. L’alestiment al è “open air”, tant che al è just par une conte visive che e fevele di nature in libertât.
Lis vincj imagjins selezionadis (parsore, une cerce) a mostrin particolârs che a caraterizin la art contadine, la vite di gjenerazions interiis che a àn tignût memorie de gjenuinitât leade ai prodots de tiere. E ven fûr dute la sensibilitât dal artist e dal om che al imortale la vite de campagne, parcè che al riten fondamentâl trasmeti il lassit dal impegn spindût a lavorâ la tiere.
«La mostre e je un percors gustatîf e storic – a marchin i promotôrs –, stant che al torne a scuvierzi la cualitât dal tipichementri furlan e i colôrs, blanc e neri, propris dai agns Setante cuant che si davuelzeve chel al è esponût te citât dal mosaic».
La mostre (la scree e je sabide ai 14 di Mai, aes 10 e mieze di matine) e je, duncje, un invît a tornâ a scuvierzi, a traviers dal voli di Gianenrico Vendramin, il savôr des vitis impegnadis tai cjamps e dai prodots che a nassin des mans atentis e pazientis di cui che al lavore la tiere.
Erika Adami