ATUALITÂT – Spirt di servizi o sante scugne?

La storie des feminis cjargnelis impleadis te prime vuere mondiâl, come tancj episodis leâts a lis vicendis militârs, e je dispès cjamade di retoriche.
Lant a sgarfâ ca e là tai libris, tai documents e soredut podint viodi e sintî la vôs di cualchi puartadore, o ai vude la grande ocasion di svicinâmi a un moment impuartant de storie de mê tiere di Ciargne. O ai capît che lôr a son stadis, a son e a restaran un simbul, un esempli di sacrifici, di umiltât e di amôr pe proprie tiere e pes lôr fameis.
La lôr storie si insuaze te prime vuere mondiâl: tal mês di Lui dal 1915, par fâ front aes grandis pierditis di soldâts dai prins combatiments, il Comant di zone al domande il contribût de popolazion par sostituî i militârs che invezit di jessi al front a vevin di ocupâsi dal traspuart de robe. Tai paîs cjargnei a jerin restâts dome fruts, vecjos e feminis, e propit lôr a son ladis a dâ une man (si contin cirche 1.200 di lôr, dai 12 ai 60 agns). A vevin intor une fassete rosse cul numar dal repart e ognidune e veve un libret personâl par segnâ i viaçs e i materiâi traspuartâts.
Anna Primus Nanali di Tamau, intun filmât fat tancj agns fa de emitente televisive ‘Video Strega’ di Çurçuvint e conte «…i vin començât la strada ch’a va sù pa creta insomp dal paîs. I la vin fata sù fint sul Gamspitz. La vin fata duta chê strada tra omps e feminas e a lassù i todescs dal Freikofel a nus viodevin ca un toc… lôr no nus volevin fâ dal mâl, parcè che lôr ai capivin come ch’i erin sfuarçâts a lavorâ e no nus volevin copâ… tal ’16, tanta di chê neif, palâ la neif cui scarpets e cu las çuculas…». A vevin di presentâsi a buinore tai magazins dai paîs e po «i partivin as 7 e intorn misdì a si rivave sù – a conte Caterina Bellina di Cleulis – i puartavin sù pan, scjatuletas, dut ce ch’a coventava, encje la puesta. Inta mont da Tierç i puartavin sù munizions…».
Dome tal 1973 a àn ricevût il Cavalierât pal lôr impuartant contribût: plui di cualchidune intes intervistis e dîs che al è rivât masse tart. Tal 1988 e nas la idee dal monument a Tamau, screât tal 1992 e vuê in nomine pal ricognossiment nazionâl. Intant «Puartadoris» no ’nd è plui e nus reste la lôr testemoneance, come chê di Vigje Boschetti «i tolevi las brees in place a Çurçuvint Disot e po sin ladas a puartâ fint insomp Carone. Mostro di brees, i si inçopedavin intai gjups e po i colavin… Jo i eri la prime di cjase e i si contentavin di ce che ai davin, i sei lade volontarie a dâ une man, parcè che a si veve la bisugne e i militârs a vevin di fâ las baraches».
Marta Vezzi