ATUALITÂT – Cuant che i numars a deventin une opinion

L’Istât al è passât e cun lui ancje la setime convention di «Ente Friuli nel mondo» che chest an e veve come titul «I zovins e la furlanetât tai agns 2000». Ai 31 di Lui a Maian, la relazion principâl e je stade di Bruno Tellia, sociolic de Universitât dal Friûl, che al à analizât i risultâts di un scandai difondût midiant dal sît Internet dal ent e publicizât sul so profîl di Facebook.
Come che il stes Tellia al à dit te premesse, chest al jere un campion no significatîf stant che il numar des personis che a àn rispuindût al jere condizionât: il cuestionari al jere dome su Internet e i destinataris, zovins di divignince furlane, a jerin utents dal social network. Duncje une nichie te nichie.
Ce che al à smaraveât di plui al è il tai che al è stât dât a la leture dai risultâts di chest scandai.
FURLAN? SIERÂT IN CJASE_ Tellia al à marcât plui voltis che il furlan al à di restâ «lenghe de intimitât», cuasi che puartâlu fûr di cjase al fos un element di vergogne. Cheste vision e je datade rispiet a lis atuâls normativis no dome dal Stât talian, ma ancje a nivel european e mondiâl che a garantissin la dignitât des lenghis propriis. Il stes Bruno Pizzul al à fat presint che e mancjave la version furlane des domandis. Cun di plui, a distance di cuasit 2 mês, sul sît dal ent a son inmò lis domandis, ma no si cjatin i risultâts
VALUSSI DOCET… DIU NUS VUARDI_ Ma la piês che si à sintût ta chê zornade al è stât l’invît che Tellia al à fat ai emigrants furlans, ven a stâi di metisi adun cun dutis chês altris associazions dai emigrants talians par meti insieme une macro identitât taliane. Pacifico Valussi (1813-1893) al veve inventade la definizion «piçule Patrie» (fevelant dal Friûl, in rapuart a une «grande patrie» che e varès di jessi la Italie…) e o viodìn che a distance di passe 100 agns chel model al continue a jessi doprât. O cjapìn at de «modernitât» de teorie, ma o preferìn cjalâ ai nestris principis di braure furlane, confuartâts dal fat che nus ven daûr, come che al à ricuardât ancje Christian Romanini tal so intervent di chê dì, un ciert Robert Jhonson, guru di nomee mondiâl e za consulent di Bill Clinton, Bill Gates e Micheal Jordan. Tra i siei principis al è ancje chel di “distinguisi par no estinguisi”. Si domandìn ce che al sarès sucedût se a vessin scoltât il consei di Tellia i tancj esemplis de nestre emigrazion, dispès nomenâts tant che virtûos, come in Canadà pal sucès che chê comunitât furlane e à concuistât (o tornìn a ricuardâ vulintîr la ministre Sandra Pizzolitto o il costrutôr Mario Collavino) o in Argjentine (cuant che tal 1876 il prin ministri de Argjentine Nicolas Avellaneda al pensave a une leç di imigrazion al à cirût cuâi che a podevin jessi i destinataris di chestis assegnazions di terens e i è stât rispuindût e conseât un popul che al steve tal nord Italie, ai confins cul mont austriac, e che si clamave (e si clame) «furlans»).
PAR NO SMAVÎSI_ Noaltris o preferìn stâ cun cui che fint in dì di vuê nol à volût smavî la identitât furlane. Cualchidun nus puedial acusâ di jessi ideologjics? Forsit, ma se al pues permetissal un docent universitari… pecjât che si vedi scugnût sintî chest intervent intune assemblee di un ent che al varès di difindi la identitât furlane tal forest.
Redazion