TERITORIS – INTERNAZIONÂL. Plui fuarce aes rivendicazions indipendentistis

Ai 22 di Lui la Cort internazionâl di justizie e à dite che la declarazion di indipendence dal Cossovo no va cuintri de legalitât internazionâl. La sentence e je la rispueste al guvier di Belgrât che al veve domandât ae Cort di pronunciâsi su la legalitât de indipendence declarade in maniere unilaterâl dal Cossovo ai 17 di Fevrâr dal 2008.
I COMENTS_ Denant di cheste sentence lis reazions a son stadis une vore diviersis. Pes autoritâts serbis, dal moment che no si trate di un at vincolant, nol cambie nuie rispiet ae risoluzion ONU 1244 che e fevele dal Cossovo tant che di un teritori inmò sot de sovranitât serbe. Pal guvier di Pristina, vuidât dal prin ministri Hashim Thaçi, cheste sentence e da plui fuarce al Cossovo e e permetarà di cressi il numar dai stâts che lu ricognossin tant che sogjet indipendent.
La decision di Cort internazionâl di justizie, dut câs, e à un pês che al va plui innà dai rapuarts jenfri Belgrât e Pristina par vie che e rapresente un precedent no di pôc sul plan internazionâl. Prin di dut par chei teritoris che si cjatin bielzà intune situazion similâr a chê dal Cossovo, ven a dî une indipendence di fat, ma cence un ricognossiment internazionâl plan.
ALTRIS REALTÂTS câs, par esempli, de Ossezie meridionâl, de Abcasie e de Transnistrie. Cun di plui, il guvier bosgnac nol à platât la sô pôre che la decision de Cort e dedi un sburt ae indipendence de Republika Srpska, o sei la part serbe de Bosgne. La sentence, però, e je stade cjalade cuntune vore di interès ancje di chês comunitâts nazionâls che a vuelin deventâ indipendentis. Nol è un câs che ai prins di Avost, intant des Ghjurnate di Corti, i rapresentants dai partîts indipendentiscj de Corsiche, dal Paîs Basc, de Catalogne, de Sardegne e de Gnove Caledonie a vedin dite che aromai «la acetazion de ipotesi indipendentiste e je deventade realtât».
DIFICOLTÂTS CONTINUIS_ In Cossovo però la situazion e reste dificile. Cualchi zornade daspò de sentence de Cort internazionâl di justizie, la fuarce di polizie internazionâl e à comunicât che e passarà in man aes autoritâts cossovanis la protezion dai lûcs sacris serps in Cossovo. Une decision che la comunitât serbe e à cjapât une vore mâl a front de esperience di violence vivude intal 2004. Ai serps no i plâs nancje la intenzion dal guvier di Pristina di fâ sù gnovis struturis te part Nord di Mitrovica, di là dal flum Ibar, là che la popolazion e je a maiorance serbe e la uniche autoritât ricognossude e reste chê di Belgrât.
Carli Pup