CURTIS E CHE SI TOCJIN. Incuintri cu lis Categoriis produtivis e i Sindacâts

Ancjemò une volte, daspò il prin di Lui dal an passât, il Comitât pe autonomie e il rilanç dal Friûl si è metût adun cu lis Associazions dai imprenditôrs dal Artesanât, de Confindustrie, dai Piçui industriâi, dai trê Sindacâts dai lavorents, par discuti e par inmaneâ un impuartant document pes Autoritâts locâls e pe Regjon, par fâ front ae situazion di crisi economiche e ocupazionâl simpri plui grivie che e sta invistint il Friûl.
Il document dal an passât al tignive cont, plui in gjenerâl, de dibisugne di tirâ fûr il Friûl de ombrene, par frontâ lis prospetivis di disvilup economic, sociâl e culturâl de nestre interie aree furlane, comprendudis lis infrastruturis stradâls e feroviariis. E tornant a dâ – a chest fin – centralitât al obietîf dal autoguvier dal Friûl, ae sô Comunitât des Provinciis furlanis, par pesâ di plui, sei viers Triest, sei viers Rome e Bruxelles.
Cheste volte, l’impegn dai autonomiscj, des Categoriis produtivis e dai Sindacâts, si è centrât plui sul caratar sistemic de crisi e su la sô vastitât che a stan dant jù su lis struturis produtivis tradizionâls dal Friûl e su lis condizions di lavôr, cetant plui in profonditât di ce che si sperave. Fin al pont di provocâ une sirocade, purtrop no momentanie, des condizions di svilup e di benstâ metûts adun in cheste ete de nestre int.
Di conseguence, cul impegn di ducj, e je vignude fûr la necessitât di meti in vore subit lis tantis oparis publichis za finanziadis e dome di apaltâ. Si fevele di 300 milions di euros (font ANCI) di lavôrs di meti subit in cantîr tes provinciis furlanis. A saressin un volan impuartant par tornâ a meti in moviment sei lis ativitâts produtivis, sei la ocupazion di lavorents.
Par otignî chest risultât, si à domandât aes Autoritâts proceduris plui lizeris pal afidament dai lavôrs, cun propuestis concretis par un intervent legjislatîf regjonâl. In particolâr, al è stât domandât – come che al è sucedût daspò il taramot dal 1976, par meti in vore une ricostruzion di presse – che il President de Regjon si cjapi su la schene, in vie ecezionâl, funzions straordenariis che a sigurin tempestivitât e coretece tal procès di realizazion des oparis publichis.
Il President de Zonte, i Partîts e i Grups consiliârs de Regjon a son stâs invistîts des propuestis e des domandis dal Comitât pe autonomie e il rilanç dal Friûl, des Associazions des impresis e dai Sindacâts dai lavorents. Fin cumò nol risulte che a vebin rispuindût. Lu fasarano, sì o no, tal interès dal Friûl e de sô int?
ARNALT BARACÊT