ATUALITÂT. 482/99: alc di plui al rivarà

Inversion di tindince positive tai finanziaments pe leç 482/99. Pe prime volte in 10 agns al somearès che la leç e gjoldarà di une incressite des risorsis a pro de tutele e de promozion des lenghis minoritaris. Nissune conferme uficiâl e je ancjemò rivade in Regjon, al sotlinee l’assessôr regjonâl ae Culture, Roberto Molinaro. Dut câs, la biele gnove e larès a rispuindi a une prioritât une vore sintude: la scuele. Ma seont il «pari» de leç regjonâl sul furlan, il conseîr regjonâl Roberto Antonaz, ex assessôr regjonâl ae Culture, il belanç dai dîs agns de leç 482 al è «negatîf».
SIMPRI SOTFINANZIADE_Di cuant che e je in vore, la leç che e introdûs la tutele des minorancis storichis linguistichis che a son tal Stât talian – in particolâr chês albanese, catalane, todescje, greghe, slovene, cravuate, francese, franc-provenzâl, furlane, ladine, ocitane e sarde – no je mai stade une vore siore di beçs.
Il fin principâl de leç, si sa, al è chel di judâ la promozion e l’ûs des lenghis minoritaris inte aministrazion publiche tant che tal insegnament inte scuelis e la concession di spazis pe lenghe inte television publiche.
Ma dal 1999 in dì di vuê, lis risorsis de leç si son un tic par volte ridusudis dai 10 milions iniziâi ai pôc plui di 2 milions di euros di vuê, un cuint dal totâl. Une miserie par frontâ lis esigienzis de tutele e de promozion des lenghis des minorancis.
LIS PRIORITÂTS_E se nol è stât ancjemò metût nuie neri su blanc, al pararès che pal 2010 in Friûl – Vignesie Julie a varessin di rivâ dongje plui o mancul 700 mil euros. Tal 2009 a jerin cirche 550 mîl.
«Se a fossin confermadis – al à spiegât l’assessôr Molinaro – o varìn la esigjence di belancialis sul teritori. La leç 482 e tutele sul nestri teritori trê lenghis, ma pal sloven o vin ancje altris canâi e tant plui fuarts. Si varà ancje di verificâ che no vedin bielzà vincui pe destinazion».
Une volte inte sachete, i beçs a varessin la lôr destinanzion: la scuele, sedi pal insegnament che pe formazion dai mestris.
«Si cjale simpri ce che al mancje e mai ce che al è stât fat – al à marcât l’assessôr Molinaro – ma in dîs agns tantis robis a son stadis fatis».
PAS INDEVANT_A testemoneâlu – seont Molinaro – il judizi dai rapresentants dal Comitât european che al viôt de Convenzion cuadri pe protezion des minorancis nazionâls, in visite – dopo l’ultin incuintri, cinc agns indaûr – ai rapresentants politics e des realtâts associativis impegnadis inte promozion des lenghis minorizadis dal Friûl. «Seont lôr, a son stâts fats grancj pas indevant».
Simpri trê i trois pal furlan: l’ûs tal public, i mieçs di informazion e la scuele.
«Pai sportei al è stât fat tant e l’obietîf al è lâ indevant su cheste strade – al à afermât Molinaro – sul front de informazion la cuestion plui grivie e je chê dal contrat di servizi Rai – Ministeri des comunicazions» dulà che si riscje che, ancjemò une volte, no sedin cjapadis sù lis indicazions previodudis de leç 482 pe presince des lenghis minoritariis intal servizi radiotelevisîf public. «Su chest front al è l’impegn di ducj a sburtâ. O vin fat dut ce che al jere di fâ: cumò o spietìn la rispueste dal Guvier».
IL GROP DE SCUELE_ Infin, la scuele: «A son dôs lis cuistions: la prime, e je une linie di spese che e vedi continuitât tal timp; la seconde, la formazion dai insegnants. O varìn di fâ il pont su chest e rivâ a une liste regjonâl dai insegnants di furlan».
Pe fin dal 2010, al à anticipât l’assessôr Molinaro, «o firmarìn un acuardi cu la Universitât dal Friûl par iniziativis pe formazion e l’inzornament e pe ricercje. La tutele de lenghe no pues jessi dispierdude, e covente une regjie uniche, regjonâl».
SINISTRE INSODISFATE_ Pal conseîr regjonâl Roberto Antonaz, «il belanç di dîs agns di leç 482 al è negatîf, come lis risorsis che simpri mancul a vegnin stanziadis a pro dal proviodiment».
«In Italie no si è ancjemò capît, a diference dai altris Paîs europeans, la impuartance de valorizazion des lenghis minoritariis. Ta chês altris realtâts nissun si insumiarès di taiâ lis risorsis su chest capitul parcè che la tutele des lenghis e je considerade une robe acessorie».
«Chest par une concezion di nazionalisim centralistic, pe pôre che la valorizazion e la tutele des lenghis minoritariis e varès podût puartâ ae disgregazion». No miôr a van lis robis a nivel regjonâl, seont l’esponent di Rifondazion Comuniste «E mancje la sensibilitât sore chest teme. La Destre, e la Leghe parsore ducj, e piture une caricature de tutele de lenghe che e provoche dome dams».
Sonia Sicco