No Good meets Passion: il Friûl che si môf, che al cambie e che nol à pôre di mostrâsi a SUNS Europe 2025

Al esist un Friûl che no si ferme, che al maravee e che al sa cemût fâsi sintî: si è podût viodi dilunc la finâl di SUNS Europe 2025, cul la colaborazion esplosive jenfri i No Good e Ferdinando “Passion” Passone. Un incuintri no spietât, ma che al è nassût in maniere naturâl: di une bande, la potence des ghitaris punk dai No Good, di chê altre, i viers poetics, critics e cualchi volte profetics di Passion, gjornalist publicist, tecnic storic e ex president di Radio Onde Furlane.
◆ Il concierton finâl di SUNS, come par tradizion, si è tignût sabide ai 6 Dicembar tal Teatri Gnûf “Giovanni da Udine”. Sul palc si son alternâts artiscj di dute Europe, selezionâts tra plui di novante candidâts: le catalane Lia Sampai, la galese Mali Hâf, il faroês Marius Ziska, i ladins Popcorner, i sarts Shardana, la basche Verde Prato. Cui furlans No Good meets Passion a rapresentâ la nestre tiere. Un viaç musicâl che al travierse mârs e monts, gjenerazions diviersis, cu lis lenghis minoritariis come protagonistis.
◆ Il progjet No Good meets Passion al è stât definît come la «colaborazion definitive che la sene furlane e stave spietant». Passion al contribuìs cui siei viers profonts, bogns di contâ il presint cun luciditât, ironie e profonditât, puartant sul palc la esperience di cui che al à passât desenis di agns tra microfons, mixers e redazions, cognossint il Friûl come pôcs altris.
◆ I No Good a cjapin dut chest materiâl fat di tantis esperiencis e lu trasformin cun riffs distrutîfs, energjie pure e ritmis che a scjassin.
Lis peraulis a deventin critiche sociâl, responsabilitât politiche, memoriis de atualitât plui avilente, ma ancje une berlade di rivolte, un disveâsi coletîf: un vêr motopic de anime. La vôs esperte e cussiente di Passion si font cu la urgjence dai No Good, creant une performance che e misclice riflession e energjie pure, une vere esperience che e cjape il public.
◆ I No Good, nassûts a Udin tal 2020, a àn une storie di grinte e identitât. Il lôr album di esordi, “Storia di Anonima Controtendenza”, al à miscliçât punk, rock e cjantautorât talian cul influencis dai Bad Religion, Misfits, Articolo 31, Prozac+ e Punkreas. Tal timp a àn consolidât il lôr sun cun plui tocs di sucès e rivisitazions punk di classics talians, rivant fin al singul “Demoni” publicât tal Zenâr dal 2025 e a un album che a publicaran ae fin dal an.
◆ La presince in finâl a SUNS Europe no je stade dome un travuart, ma un manifest de vitalitât de sene furlane: un progjet che al met adun la esperience, la memorie e la profonditât di Passion cun la fuarce e energjie dai No Good.
No Good meets Passion e je la prove che il Friûl al sa inovâ, unî gjenerazions diferentis e puartâ la sô vôs tal mont cun energjie, profonditât e autenticitât. Un Friûl che al berle e che al riflet, che al cjante e al sacode. Un Friûl che, graciis a Passion e ai No Good, al à mostrât che lis sôs storiis, peraulis e notis a puedin rivâ dapardut.
◆ E se si sês pierdûts la finâl, sul sît uficiâl di SUNS Europe ( https://www.sunseurope.com/fur/ ), o podês tornâ a viodi ducj i contignûts: i videos, lis cronichis e i risultâts. O podarês viodi la performance, savê se il Friûl al è rivât sul podi e, soredut, capî parcè che chest progjet al à fat e fasarà tant fevelâ di se.
No Good meets Passion nol è alc che si pues spiegâ fin sot, ma si à di vivilu. E cheste colaborazion e je une strente di man tra storie e presint, tra radio indipendente e salis di prove, tra une vôs che e à scjavaçât decenis e un grup che la sô strade le sta ancjemò fasint. Al è il Friûl che si môf, che al cambie e che nol à pôre di mostrâsi. ❚