A son une vore i atletis furlans che a fasin lis garis di Ironman. Cuatri a son students di Felet
Ju clamin “ironmen”, ven a stâi oms di fier. Un non che al vûl meti in evidence la resistence, la garbure di resisti in cundizions di no crodi: cjalt, frêt, te aghe, a cori cu la biciclete cuintri dal aiar, par centenârs di chilometris. Massime intai ultins agns, in Friûl a son vignûts fûr une vore di apassionâts di cheste ativitât sportive. Une voie di lâ a cirî il limit personâl, di lâ parsore di dutis lis dificoltâts, di cirî di rivâ insom di une gare impussibile di sierâ cence un alenament cetant lunc e puntiliôs. Elements come la resilience e, dibot, ancje la inclusion a son centrâi in dutis lis provis di triathlon e di Ironman, che al è il formât plui slargjât dal triathlon. I protagoniscj de storie a son i atletis furlans che, intune matine dal ultin mês di Novembar, si son cjatâts inte scuele di Felet, une sede dal Istitût comprensîf di Tavagnà, par fevelâ cui zovins students che a frecuentin i cors de scuele locâl a orientament sportîf.“Cuant che tu fasis une gare di dodis, tredis oris, come che a fasin nô – al conte Alberto Cirio, di Lignan, un dai atletis clamâts a fevelâ ai zovins students -, i moments di crisi a son une vore. Baste pensâ che, bielzà dopo i 3,8km di nadâ, tantis voltis in aghis no cuietis, tu vegnis fûr da la aghe che tu sês avonde strac e no tu âs tante voie di lâ indenant. Invezit, tu scuegnis no molâ e montâ suntune biciclete, par altris vot oris. Cun di plui, dispès propite su la biciclete ti rivin cuintri i moments plui dificii. Ancje dongje, finît di pedalâ, tu âs di cori une maratone, cence fermâti. Lis dificoltâts ti sburtin a cirî di gjestî il cjâf, i pinsîrs e il fisic. E covente cetante esperience: dut câs, cuant che tu cjatis il mût di lâ parsore di dut, tu ti sintis une vore ben. Dut il sport e massime cheste ativitât sportive ti insegnin ben ce che al vûl dî la peraule sacrifici”.
__
Us clamin “mats” ma sêso pardabon “fûr cul cjâf”?
“Cuant che o conti che o soi un om di fier – al dîs Roberto Ardito – tantis personis a restin inçuchidis. Dut câs, dut al nas de passion pal sport, intindût tant che ativitât che ti fâs stâ ben. No dome in gare, ancje cuant che o finìs un alenament mi sint une vore miôr, a nivel mentâl e fisic. A contâle dute, dispès insom di un sfuarç il cuarp ti dîs che forsit al è miôr fermâsi, ma intant il cjâf al dîs di lâ indenant. No sin professioniscj e al è simpri une vore complès cirî il timp di alenâsi e di lâ a fâ garis. Ancje parcè che o vin lis fameis, o vin il lavôr, o vin impegns personâls. Rivâ insom di un alenament o di une gare ti puarte entusiasim e motivazion par tornâ a scomençâ e cheste e je une des parts plui bielis di dut”.
__
Cuant che si fevele di triathlon e Ironman, no si conte di vê fat risultâts: si conte di vê passât il travuart. Il concet al è diferent.
“Dut just. – al conferme Marco Grimaz, che al è rivât intai prins dîs des cualificazions pal campionât dal mont inte sô categorie – La sfide no je cirî il risultât, il timp, la prestazion par meti in evidence i numars. Le sfide e je chê di lâ cuintri i limits personâi, di lâ parsore de soference. Di bot, l’aversari nol è un altri atlete: al è se stes. O ai fat une vore di altris sports: la maratone, il balon. O soi rivât a fâ Ironman dome insom de cariere e cumò o sint di stâ une vore ben, parcè che o ten in forme il fisic e il cjâf. Ti puarte a vê une vision che e risulte positive inte vite di ogni dì, chê che ti covente in ducj i ambits”.
__
In sumis, beneficis di no crodi?
“Fevelìnsi clâr. – al ribat Eliseo Rainone – Nol è che intal mont a sedin cetancj di lôr fûr cul cjâf che a decidin di spacâsi dut par fa chês distancis. Ognidun al fâs triathlon par une reson e une decision personâl. Jo o ai scomençât a fâ sport massime par une cuistion di salût e, pôc par volte, al è deventât un stîl di vite. E je une fusion di impegn e mentalitât che mi jude. Tantis voltis, cuant che o ai un probleme intal lavôr, o ai miôr molâ la robe, lâ a cori, cjatâ lis sensazions miôr e, daspò, tornâ sot cu la profession. Al zove une vore. Fondamentâl al è l’aspiet dal divertiment. Fâ sport al scuen jessi une ativitât che ti plâs fâ. Tignint fûr l’ingôs e la sbisie. Chei che a rivin a fâlu cussì, a cjatin cetancj beneficis ancje inte vite”. ❚
:::::::::::::::::::::::::::::::::::::::::::::::::::::::::::::::::
LÂ A CIRÎ IL LIMIT PERSONÂL: UN ATLETE IN LOTE CUINTRI SE STES
Si fevele di “oms di fier” par intindi une distance di cori, nadant, corint in biciclete e a pît. Salacor al è un triathlon une vore plui lunc, parcè che si scuen nadâ par 3,86 km, daspò cori par 180,260 km in biciclete e, intal ultin, cori une maratone a pît, su la distance classiche dai 42,195 km. Lis misuris a son compagnis sedi inte competizion femenine, sedi par chê masculine. Par solit, il triathlon al conte misuris plui curtis, dibot la metât: 1.500 metris di nadâ, 40 km cu la biciclete e 10 di corse a pît. Cun chês misuris, al è impussibil pensâ di rivâ insom cence le preparazion juste. L’obietîf di ducj chei che a fasin garis dal gjenar al è chel di lâ a cirî il limit personâl. Scuasit mai un atlete che al cor un Ironman al cor cuintri cualchidun altri: la sfide e je simpri massime cuintri se stes. Tant che intes garis si bat lis mans a ducj, ancje al ultin che al rive, propit parcè che il sfuarç al è compagn par ducj.
Par jessî alenât, un ironman al à di cori, al à di tignîsi in forme, al à di lavorâ une vore cun dutis lis resistencis par cetant timp. Impussibil ancje dome cirî di partî cence une preparazion idonie.
Intal timp, par dut il mont, si son afermadis come lis garis principâls lis provis des Isulis Hawaii e massime i atletis nordeuropeans a àn fat viodi di jessî une vore competitîfs. Dut câs, ancje in Italie e in Friûl la dissipline e à cjapât pît e cumò si pues fevelâ di un moviment impuartant ancje achì di noaltris. ❚
:::::::::::::::::::::::::::::::::::::::::::::::::::::::::::::::::::
UNE ZORNADE A SCUELE: TESTEMONEANCIS E TANCJ FATAREI DI CONTÂ
Denant dai students di Tavagnà, ai prins di Novembar dal 2025, cuatri atletis furlans a àn fevelât de lôr esperience di ironmen. Alberto Cirio, Marco Grimaz, Roberto Ardito e Eliseo Rainone, che al è ancje il referent nazionâl pal Triathlon tal ent pe promozion sportive nomenât CSEN (Centri Sportîf Educatîf Nazionâl), a àn contât ce che al vûl dî jessi oms di fier. Il messaç al è stât chel di sapontâ il concet che “dut al è pussibil”. L’obietîf dal incuintri al è stât chel di stiçâ i zovins a discuvierzi la passion par lâ a cirî i limits de resistence e de motivazion personâl. No dome inte ativitât sportive. Cui students e a fevelâ cui atletis al jere ancje il professôr Claudio Melchior, de Universitât dal Friûl, espert di sociologjie, che al à dât une vore di imboconadis par lâ indenant cu la discussion.
Fra lis tantis domandis, massime une cuistion e à cjapât la atenzion dai students: parcè fâ cetante fature? La rispueste e je stade semplice: par cumbinâ intal miôr mût pussibil lis motivazions personâls e la volontât di stâ ben. Parcè che, di cuant che al esist il mont, lâ a cirî il limit, lâi dongje e passâlu al è une ativitât che e fâs cressi la persone, sedi dal pont di viste fisic, sedi massime sot l’aspiet mentâl.
Si che duncje, il triathlon e la sô componente plui dure, l’Ironman, al vâl tant che metafore dal impegn di ogni dì, par cirî di miorâsi e di usâsi a no molâ. ❚
