‘No’ dai slovens al suicidi assistût

Tal ultin, dopo cuasi un an e mieç di campagne e doi referendums popolârs, i citadins dal Paîs nestri vicin a àn decidût: se ai 9 di Jugn dal an passât il 54,89% di chei che a vevin votât a vevin sielzût di jessi a pro de eutanasie volontarie (o ben ‘suicidi assistût’) par fâ cessâ la proprie vite in câs di malatiis di no podê curâ, ai 23 di Novembar stâts il risultât al è stât dal dut contrari. In cheste ocasion, la consultazion popolâr e domandave se si jere a pro o cuintri de leç fate buine de Cjamare di Stât di Lubiane ai 24 di Lui di chest an, che juste apont e permeteve di gjoldi dal dirit dal suicidi assistût, volude dal guvier Golob su la fonde dal referendum dal an passât. Chest colp il 53,4% al à sielzût il ‘no’: i votants a son stâts il 40,91% sul totâl di 1,7 milions. Dome intun dai 8 coleçs eletorâi che al è dividût il Paîs, chel di ‘Lubiane Sud’, al à vinçût il ‘sì’. La campagne referendarie e je stade infogade soredut tai ultins mês, massime di bande dai promotôrs dal ‘no’, che a àn vût cun lôr tancj miedis e membris de Glesie, incolpâts dai sostignidôrs dal ‘sì’ di jessi intervignûts masse dispès cuintri de leç. Aleš Primc, un dai prins a sbruntâ cuintri cheste norme, al à fat fieste par vie che -par lui- la vite de int plui debile e massime dai viei no riscjarà di jessi calcolade come nuie.
◆ E cumò? Par leç, la Cjamare no pues fâ buine une altre normative sul suicidi assistût par un an intîr. Tal Març dal 2026 a saran lis elezions parlamentârs, e la sconfite de coalizion dai trê partîts che a poin il guvier di centriçampe che e veve fate buine la leç un an e mieç indaûr e je stade marcade de oposizion di drete. Forsit ancje cjalant al vôt dal an che al ven, i partîts dal guvier Golob no si son esponûts plui di tant in cheste campagne referendarie.
◆ Intant a Isule (Izola/Isola), citât su la cueste, e je vignude fûr une cuistion che e tocje in maniere direte la minorance taliane dal puest. I membris dal circul Vitanova a àn lamentât il fat che in cualchi seç eletorâl in ocasion dal referendum no sedi stade esponude la bandiere taliane adun cun chê slovene e chê europeane, cemût che e previôt la leç. Salacor al somee che cheste decision e sedi rivade de Comission eletorâl centrâl: dome une mancjance? ❚