“Tornâ a Darte”: une opare musive par ricuardâ la poete Gina Marpillero

Sabide ai 8 di Novembar dal 2025, in Place Fontane a Darte, sot un cîl turchin, e je stade screade la gnove opare musive “Tornâ a Darte”, fate par ricuardâ la poete Gina Marpillero, inte stesse place che le à viodude nassi tal 1912.
◆ Il progjet al è stât volût e sostignût de Associazion Culturâl Amîs di Darte APS. La associazion e nas tal 1999 cul obietîf di coltivâ culture, socialitât e comunitât in chest piçul comun. Cun Gina, la colaborazion e je stade lungje e impuartante: tai agns ’90 la associazion e à presentât cualchi sô opare e e à realizât un calendari dedicât a jê cun poesiis çumadis tai siei libris, e tal 1995 i è stade dade la citadinance onorarie dal Comun di Darte. Di cuant che e je mancjade, la colaborazion e je lade indavant cui fîs Caterina e Fabiano. Dal 2012 indenant, di fat, cul progjet “Gina”, in ocasion dal centenari da sô nassite, lis scuelis di Darte a puartin il so non ‘in memoriam’; tal 2018, tal so ricuart, flics di vert public dal paîs a son stâts insiorâts cun biei cûrs che a mostrin mûts di dî gjavâts fûr dal so libri ‘Mê mari a diseve’ (sedi par furlan che par talian). Cheste ultime iniziative e je preseade ogni an dai turiscj che spes si fermin a lei. “Tornâ a Darte” al vûl jessi inmò un pas tal percors condividût di memorie e di agrât. Gina cussì e torne cjase in maniere simboliche.
◆ In cheste suaze la Associazion e à pensât di contatâ Giulio Candussio, cjargnel e mosaicist di innomine internazionâl, che al à butât jù il progjet che, dopo aprovât, al è passât al Studi “Musivaria mosaici” di Silvia Angeletti e Donatella Garabello di Udin, che lu à tramudât in realtât.
◆ Il maestri mosaicist Giulio Candussio, origjinari di Paulâr, nus à dit: “O volevi che la sô memorie e restàs vive pes gjenerazions di doman. O ai sielt il mosaic tant che soluzion tecniche espressive par aredâ chest cjanton public particolâr tra i arbui. Mosaic, parcè che al è tradizionâl; “Julium Carnicum” al è a un respîr di Darte, e ancje parcè che il mosaic al dure e nol à pôre dai cambiaments dal timp. O ai cirût une formule inovative in cont des liniis tradizionâls che o viodìn dispès tai monuments comemoratîfs. No ai ocupât dut il vueit des trê nicjis di piere parcè che o volevi che la decorazion e cjacaràs cul lûc che i da acet e cul ambient dulintor. Cul cambiâ des stagjons, al cambie ancje il caratar di un lûc e a cambiin lis relazions tra la figurazion de conte e il spazi che le involuce. E al è propit cuant che la lûs e devente plui preziose che i colôrs si dan la volte intun rapuart delicât tra ambient naturâl, architeture spontanie e spazi vivût dal om in cheste tiere di mont. La opare, a diestre e a çampe, e mostre dôs parts di teritori cun prâts e crets e, sore de figure, il paisaç de mont: insiemi a contin `la poesie e la sô nature´.”
◆ Silvia Angeletti e Donatella Garabello, che a àn fat il lavôr, nus contin: “O vin cirût di dâ anime e cuarp ae poetesse cui colôrs de sô Cjargne: tiere, aghe e cîl.”
Dut chest al è stât realizât graciis ai contribûts de Associazion Culturâl Amîs di Darte, dal Comun di Darte, de Regjon Friûl-Vignesie Julie, dal Consorzi Bim Tagliamento, de Comunitât di Mont de Cjargne e de Fondazion Friûl.
◆ A chest moment impuartant a àn volût rindi omaç cun peraulis e musiche il Coro G. Peresson di Dimplan e il cjantautôr cjargnel Gigi Maieron.
Il progjet “Tornâ a Darte” al è un prin pas. La associazion e à inmò tantis ideis di realizâ; par intant cheste opare e je une testemoneance vive dal amôr di Gina par chest paîs: ma e cjacare ancje di lidrîs, di poesie, di emozions, di sintiments, di apartignince a une comunitât di mont… si augurìn che ducj chei che a passaran in chest cjanton di paradîs a podedin respirâ e pandi la identitât e la bielece di chest teritori e la semplicitât de sô int.
◆ Par cualsisedi curiositât: www.amisdidarte.it ❚