Juste maridade cul tecnic Gianluca Calligaro,
e je cognossude e preseade di ducj
pal so lavôr te palestre di vie Marangon
Galeotto fu il ring. Vê cognossût Gianluca Calligaro, tecnic preseât de Pugjilistiche Udinese che al puarte indenant la scuele dal mestri Remo Venzo, al è stât par Cristina Delli Santi la faliscje di une relazion, saldade cu lis gnocis dai 18 di Otubar propit tal palaç dal sport “Manlio Benedetti”, la cjase de boxe furlane, intal templi vieri dal sport udinês. Ma no dome, metisi cun Calligaro al è stât ancje tirâ sù dut il pacut: l’om, l’alenadôr, il timp dedicât ai alenaments e a meti adun lis riunions e lis manifestazions. Cul passâ dal timp, Cristina e je stade simpri plui impuartante tal sodalizi dal president Leonardo Zalateu, tant che cumò e je cognossude propit come la siore de boxe furlane. In palestre, pe gjestion, e comande jê.
“O ai cognossût Gianluca dîs agns indaûr, fûr de palestre, intun locâl, dulà che al jere rivât cuntune mê amie, Martina Moro. Un tic par volte si sin metûts insiemi e mi soi cjatade tal mont dal pugjilât. In principi, mi interessave dome l’om: dut câs, mi à simpri dit che inamorâsi di lui a vûl dî inamorâsi ancje de boxe. E cussì al è stât”.
_
Cumò in palestre e comande Cristina, no mo?
“No stin a sglonfâ masse lis robis. E je vere, o soi dispès in palestre cun Gianluca e mi plâs stâ cui fantats, i atletis, passâ il timp dongje dai sportîfs in alenament. Tantis voltis, propit Gianluca mi sburte a lâ a cjase e, invezit, jo mi fermi. Massime pai plui zovins, o soi dibot une seconde mari o une agne che e viôt di lôr. O sin une famee slargjade”.
_
Puartâ indenant la scuele dal mestri Venzo e je une responsabilitât cetant grande.
“Pense che mi ricuardi une vore ben di Remo Venzo: si jevave de cjadree cuant che o rivavi. Lui al è un di chei che mi plâs simpri tignî iniment”.
_
Altris events che tu ti visis?
“Disìn che chel che al à fat a Udin Nicola Ciriani, che al à vinçût titui talians, al è alc e ce.”
_
Il pugjilât feminin viodût di Cristina Delli Santi?
“O ai cognossudis pocjis frutis. Une e je Lucia Scala, cumò o vin Giulia Giustizieri che e sta vignint fûr e o pontìn une vore su di jê”.
_
Ce fasie Cristina Delli Santi inte vite? Cuant che no tu sês in palestre, ce fâstu?
“O lavori inte mense dal ospedâl di Udin. O soi dongje dal pront socors, indulà che e lavore mê sûr. Tant che mi è capitât di clamâle par cuistions di pugjilât, par cualchidun che si jere fat mâl”.
_
In famee, fûr de palestre, di ce fevelaiso?
“Di pugjilât!! Pense che, cuant che al torne a cjase, Gianluca al à di lavorâ par meti adun i alenaments, lis riunions, lis manifestazions… nol è tant timp par fevelâ di alc altri”.
_ Mai lade suntun ring? “Po no po… par netâlu! Tantis voltis! Se tu mi domandis se o ai mai tirât cualchi pugn, disìn che a cjase ogni tant o fasìn fente, par fufignâ e pierdisi vie… Dut câs, no!”
_
Gianluca a cjase cemût isal?
“In palestre cualchi volte al à di jessi un tic trist, parcè che al è il so rûl. In cjase al è plui cuiet. Forsit, in cjase o soi plui triste jo.”
__
Tu sês bielzà une dirigjente preseade de Pugjilistiche udinese: il prossim pas?
“Mi domandin dispès di fâ alc a nivel federâl. Massime Alessandro Zuliani mi tontone: viodarìn plui indenant. A mi mi plasarès une vore impegnâmi ancje in chel, parcè che un tic di esperience cumò le ai.” ❚
::::::::::::::::::::::::::::::::::::::::::::::::::::::::::::::::
Feminis e pugjilât: in Friûl, pocjis, dut câs buinis
Vie pai agns doi mil, inte palestre de Pugjilistiche udinese, si cjatave cualchi frute che e tirave di boxe, tant che Annabella Blanchini, Aurora Cencig e Carlotta Burra. Cencig e je stade ancje professioniste, dut câs cence rivâ a lâ indenant. La passion e jere tante e le à puartade a fâ la tecniche. Plui tart, cualchi altre frute e je lade dongje, cence sburtâ plui di tant. Intai ultins agns, Lucia Scala si je rimpinade a nivel di finâls pal campionât talian, seguide dal tecnic Gianni Stroppolo, che al alene ancje sô fie, Nicole, la prime atlete di Tor di Zuin a lâ suntun ring. Cumò e je daûr a vignî fûr Giulia Giustizieri, une vore zovine e plene di passion. L’obietîf al è simpri chel di tirâ sù une tradizion ancje femenine, intun ambient che, par solit, al è dome dai oms. ❚
::::::::::::::::::::::::::::::::::::::::::::::::::::::::::::::
Il 36m memorial “mario vecchiatto”: l’event principâl de stagjon pe apu boxe
Dai prins agns Novante, la plui impuartante manifestazion di pugjilât che si ten a Udin, in Autun, al è il memorial “Mario Vecchiatto”. Un torneu che si davuelç tal palaç dal sport dedicât a Manlio Benedetti, la cjase de Pugjilistiche udinese. Intai agns, une vore di atletis a son lâts sù sul ring tirât sù de clape dai tecnics Remo Venzo prime e Gianluca Calligaro cumò.
◆ Il Memorial al è ancje la ocasion par cognossi zovins di bielis sperancis che a rivin di dut il teritori e di fûr dal Friûl; tantis voltis, ancje forescj.
◆ Chest an, ai 29 di Novembar, une sabide di sere, la organizazion e proviôt un incuintri jenfri une selezion furlane, come simpri vuidade di Calligaro, e une selezion che e rive jù de Ingletiere. Une sfide internazionâl che e metarà sul ring atletis di diviersis categoriis di pês, talians e inglês.
◆ Dispès, il Vecchiatto al è ancje la ocasion par gjoldisi pugjilât di nivel alt, fat di professioniscj. Intai ultins agns a son stâts massime Nicola Ciriani e Marco Sollero a cjapâ une vore di batimans. La sperance di ducj i apassionâts e je chê di tornâ a cjalâ campions.
◆ Si che duncje, apontament par ducj al “Benedetti” ai 29 di Novembar. ❚
