Catherine Connolly e je
la gnove presidente de Irlande
Ator pal mont a van dilunc a soflâ bugadis di svint di vuere e lis istituzions de Europe a continuin a no vê un rûl positîf par fâi cuintri a cheste tindince mondiâl. La Union Europeane (UE) in gjenerâl e la Comission Europeane (CE) plui in detai a stentin a fâ indenant une posizion unitarie e crodibile. Magari cussì no, la Europe si cjate intune situazion che e je compagne di un zuiadôr di balon sentât su la bancjute che nol è masse fuart e che par chel nol à nissune pussibilitât di jentrâ tal cjamp e zuiâ nancje un piçul bocon de partide.
◆ Si palesin simpri di plui i limits de sô architeture istituzionâl, che e je sierade inte scjaipe des dinamichis intergovernativis, in particolâr propit par ce che al tocje afârs forescj e politiche di difese. Di cuant che al è in vore il Tratât di Lisbone, il plui resint dai tratâts di riforme de UE, metût adun e fat bon dopo dal faliment di chel altri, firmât a Rome ai 29 di Otubar dal 2004, che al veve di jessi la ‘Costituzion’ de Europe, inte CE e esist fintremai la figure dal Alt Rapresentant de UE pai afârs forescj e pe politiche di difese. Cundut achel, chê funzion no rive pardabon a rapresentâ la Union parcè che i guviers dai Vincjesiet a son presonîrs ognidun dal so nazionalisim, de sô specifiche vision e dai siei interès particolârs e cussì no rivin a cjatâ un acuardi par cjapâ decisions concretis e saldis, che a puedin vê pardabon un ‘rapresentant’.
◆ La uniche robe che i Stâts membris de UE a son in cunvigne e je chê di spindi plui bêçs in armaments, ognidun par so cont, e di fâ indenant un discors public di vuere, cun manifestazions e events specifics o ben, cemût che a son daûr a fâ Cravuazie e Gjermanie, cul tornâ a vê il servizi militâr obligatori o altri formis di coscrizion par incressi il numar dai soldâts a disposizion.
La centralitât dai Stâts, involuçade di retoriche nazionaliste, e ven sburtade ancje in altris setôrs. Cheste vision, par esempli, e marche a fuart ancje la propueste di Cuadri Finanziari Plurienâl (CFP) pai agns che a van dal 2028 al 2034, che e je stade fate indenant de bande de CE. Un dai aspiets specifics che a palesin chest ategjament al è chel de gjestion dai fonts di coesion e di disvilup regjonâl, che Bruxelles, in cunvigne cui guviers, e volarès centralizâ a nivel statâl. La Aleance Libare Europeane (ALE-EFA), che a nivel continentâl e ten dongje lis fuarcis politichis che si presentin tant che espression plui sclete di regjons, minorancis e nazionalitâts al va dilunc a fâi cuintri a chest progjet, cjatant la poie di esponents di altris partîts.
◆ E covente une altre Europe, pardabon unide inte diversitât e fondade suntune democrazie disvilupade su plui nivei, daûr dal principi di sussidiarietât, in maniere che la politiche e sedi in chel istès plui dongje dai citadins e plui in stât di intervignî in maniere valide e eficaç, in ducj i diviers contescj. E je chê stesse Europe che almancul une part dai citadins europeans a domandin in maniere simpri plui fuarte, cuntune atenzion specifiche bande dal autoguvier teritoriâl, dai dirits di fonde, dal disvilup sostignibil e dal protagonisim positîf intes relazions internazionâl. Lu confermin, par esempli, la vitorie cun sù par jù il 60% dai vôts tes elezions presidenziâls dai 24 di Otubar in Irlande di Catherine Connolly, psicolighe e juriste, za sindiche di Gallimh/Galway, candidade poiade dal Sinn Féin e di altris fuarcis progressistis, o il sucès, la dì prime, dal candidât dal Plaid Cymru (PC, nazionaliscj progressiscj galês), Lindsay Whittle, tes elezions supletivis pal Senedd (Parlament dal Gales), tal coleç di Caerffilli/Caerphilly, cjapant il puest dal Labour tant che prin partît, o ancjemò la afermazion de Union Valdôtaine (UV), che dopo agns di crisi e à tornât a cjatâ la unitât e i consens, tes elezions regjonâls e locâls de Val di Aoste, tra i 28 di Setembar e i 12 di Otubar. ❚
