Oms / feminis che a san il lôr fat

Il vanzeli di cheste ultime domenie di Novembar nus cjacare des vicendis dai popui che a rivaran a la fin dal mont e nus vise di ce che al podarà sucedi in avignî. Chest discors dal Signôr si presente tun gjenar leterari di doi mil agns indaûr e nol rive a jessi cjapât dentri tai schemis tecnics de inteligjence artificiâl che no je onipotente. Lu cjatìn tal vanzeli di Mateu tal cjapitul 24, versets 37-44. Un discors, chel di Jesù, tant e tant interessant, ma mi fermarai dome aes primis peraulis che mi somein adatis par une riflession su la realtât che o stin vivint.
◆ O leìn: Di fat, come che tai dîs prin dal diluvi la int e mangjave, e beveve, si sposave e si maridave, fint a la dì che Noè al jentrà ta la arcje, e no volerin crodi fin che nol plombà jù il diluvi e ju netà vie ducj, … cussì al sarà… Veglait duncje…
◆ La nestre societât di vuê, come chê dai prins o dai ultins timps, e pues jessi viodude di dôs bandis: o dal dut superficiâl – e mangjave, e beveve – o cussiente e di buine volontât: Veglait duncje …
◆ Un fat al è evident: chei indevant cu la etât come me, si cjatìn imbranâts tal dâ une leture di cheste societât e o rivìn a capî e a valutâ alc dome paragonant l’îr che o vin vivût al cumò che o stin vivint.
◆ Semplificant, fin ai agns Otante dal secul passât, il paîs si identificave, ancje se simpri mancul, cul plevan, il mestri, il miedi, la glesie, la scuele, l’ambulatori (se al jere). La vite di paîs e jere fate di artesanât, di campagne e cul timp, de fabriche, miscliçâts insiemi; la tradizion e jere il pivot sigûr par continuâ te convivence. Il fogolâr, simbul dal Friûl, al conservave, ancje te miserie, il misteri de vite che e veve te famee la piere cjantonâl. Il paîs al leve indevant, un pôc balant e un pôc vaìnt, un pôc preant e un pôc blestemant. Dogne, il gno paîs fra i crets, e à vût ancje plui di votcent residents cun vot ostariis, intant che cumò e rive sì e no a cent e cuarante di lôr.
◆ Vuê chel mont nol è plui: finît, sepulît. Il peam tiere – famee – comunitât che al veve garantide la sorevivence tal mieç di mil miseriis, si è rot e fruçonât. Intant si cjacare simpri plui di individualisim esasperât, di mercificazion de vite, di fragjilitât e insigurece, di denatalitât e pôre dal avignî.
◆ Se o pues fâ un paragon, il Friûl di une volte al jere come fâ une cjaminade in mont. Intant che cun fadie tu ti rimpinis, il panorame si slargje e cuant che tu sês su la spice tu viodis dulintor çucs, cjanâi e planure, boscs e paîs tune vision uniche: dut unît, ancje se dut diferent. Tu contemplis dal alt e tu gjoldis di jessi te tô tiere. Tu tornarâs jù bande cjase dopo vê misurât i tiei limits, strac ma content.
◆ Il mont di vuê al è come stâ sentâts in rive al mâr: la imensitât de aghe e je devant di te, e ven a lenziti i pîts, ma subit si piert tal savalon: onde dopo onde, al infinît. L’ocean globâl di vuê ti mande la onde mediatiche in timp reâl e no ti da polse, ti cjape, ti fâs sclâf, ti fâs tignî di continui il telefonut viert. Intant gnovis di ogni sorte, cun firme o cence firme, personis di valôr, spots, sants e scovacis miscliçâts ti cjapin la zornade; cence che tu sepis, informazion, disinformazion e malinformazion si insedin in te. Une volte, tal paîs, cuntune strete di man tu decidevis tu; cumò altris, lontans e platâts, ti informin seont i lôr interès; a àn i mieçs di instupidîti e fâti decidi a lôr pro.
◆ Simpri di plui o varìn di capî che la novitât mediatiche no je la veretât reâl e che la vite, sane e biele, si nudrìs dal teritori concret li che tu vivis e no dentri di un mecanisim creât de tecniche e forsit vivût sierât bessôl intune stanzie. I risultâts si ju viôt: se al è incressût il ben materiâl, no je cressude la fraternitât; anzit violence, malatiis psichichis, disorientament a son di cjase a ogni etât, e la schirie di psicolics e je ben nudride (par cumò dome su la cjarte) che a varessin di invadi lis scuelis a jutori des ultimis gjenerazions. La tiere che tu sês nassût, cu la sô culture e storie, se tu le rispietis e stimis a pâr di une mari, ti nudrìs come une rose in flôr; il mont mediatic al è un biel garoful fat di plastiche. Al scrîf Luca Diotallevi: “Con il tempo, la globalizzazione – valida in sé – ha visto prevalere una sua versione squilibrata, cieca verso le ragioni insopprimibili del – locale -”. Il gjornalist Raniero la Valle al olme che, continuant tal sisteme, o rivarìn: “a quella soglia oltre la quale l’umano non è più umano”.
◆ O vin dibisugne di tornâ a cjatâ la cussience di nô stes, chê olme uniche che nus fâs unics culì; al è necessari liberâsi de mentalitât comerciâl, – “la int e mangjave e e beveve” – materialiste, superficiâl, li che nus àn menâts. Al scrîf Alessandro D’Avenia: “Prima mi sono dovuto liberare dell’illusione che avevo costruito su me stesso, di quello che ritenevo di essere e di dover essere. Poi mi sono dovuto liberare dall’illusione che gli altri avevano costruito su di me: un modello da imitare, un’ispirazione, uno che non sbaglia mai. Sono dovuto morire prima a me stesso e poi agli altri, e così sono venuto alla luce, ho fatto verità: sono soltanto un uomo che vuole amare ed essere amato, nel corpo e nell’anima”.
◆ Veglait, tignîtsi pronts… Cul rivâ dal an 2026 si svicine l’aniversari dai 50 agns dal taramot dai 6 di Mai dal 1976. Autoritâts regjonâls e religjosis, artiscj e scritôrs, associazions, categoriis, paîs e parochiis za a stan studiant e parecjant il grant event. Grant: di fat al ricuarde un moment eroic dai Furlans che si son fats valê te ricostruzion de lôr tiere. Tai taramots sociâi, economics, politics, religjôs e dai social che nus stan sdrondenant o vin dibisugne di gnovis riflessions e di Furlans, oms / feminis che a san il lôr fat. ❚