La rivolte plui cognossude de storie furlane e je, cun buine probabilitât, chê de Crudêl Joibe Grasse. Doi secui dopo, però, ancje la “capitâl” dal Friûl orientâl e scugnì frontâ lis violentis consecuencis de insodisfazion popolâr.
◆ Intant che la Contee di Gardiscje e jere daûr a vivi la sô ete di aur, la Contee di Gurize e viveve agns une vore dificii. Tal inizi dal diesim otâf secul si devin la volte malatiis dal besteam e ploiis distrutivis, sburtant lis popolazions rurâls de zone setentrionâl de Contee al pont de cjaristie. In chest contest, lis gnovis tassis sul vin e la cjar, promulgadis di Viene, a calarin come un flagjel. I motîfs a jerin leâts al cost dai conflits: i Asburcs a scombatevin cuintri de France inte Vuere di Sucession Spagnole par plui di dîs agns.
◆ Dut câs, nol jere tant il governadôr de Contee, Liopolt Adam di Strassolt, ni il cjâf dal distret di Tulmin, Pieri Antoni Coronin, che a jerin odeâts dai abitants inrabiâts de alte e medie Valade dal Lusiç, ma pluitost un ciert Jakob Bandeu. Al jere un racueidôr di tassis voraç e inflessibil, che al faseve une fortune grandonone a discapit des fameis de zone di Tulmin. Cheste e veve une lungje tradizion di rivoltis dai contadins, tant che la Rivolte di Tulmin, sburtade indenant cul obietîf ultin di slizerî il caric des tassis.
◆ Lis azions dai ribei a sucederin jenfri Març e Jugn dal 1713, ma a dispiet di un sucès iniziâl, la rivade di trupis di rinfuarç, mandadis dal Imperadôr Carli VI, e puartà a un epilic dramatic: la repression de rivolte e la sucessive esecuzion di undis dai siei cjâfs, includint ancje il famôs Ivan Gradnik, tal Avrîl dal 1714 a Gurize.
◆ Al di là di ducj i aprofondiments – par chescj us consei une visite al Tolminski muzej di Palaç Coronin –, ancje se lis rivoltis di Tulmin si slargjarin come un fûc salvadi, a cjaparin dentri soredut la popolazion slovene.
◆ La nature slave di cheste vicende e fo un pretest par lis polemichis che cualchi grup – pro talian, ma di sigûr no pro furlan – al à alimentât rispiet ae instalazion di une targhe cuadrilengâl in Place Vitorie, tal 1992, par ricuardâ l’event. “A chel timp la rivolte e jere viodude come une magle te storie de citât”, al à contât tal 2012 Dari Stasi, storic diretôr de riviste Isonzo-Soča, muart doi agns indaûr. Ben prin che lis barieris doganâls a colassin, l’impegn de riviste al à otignût une vitorie culturâl cuintri une segregazion de memorie storiche che e no pues apartignî a une citât di frontiere come Gurize. ❚
La rivolte di Tulmin
Enrico Rossi
