Aquilee, provincie di Lecce

Une cunvigne interessante, anzit un seminari “di formazion” al è stât metût adun de Associazion “Tierce Ricostruzion” in chel di Midun ai prins di Setembar a pene passât. E za il titul al jere une vore significatîf: “Specialità regionale e declino del Friuli. Ripartire dai valori dell’Aquileia antica per immaginare un patto rigenerativo della regione”.
◆ Nol è casual nancje il non de associazion. Tierce Ricostruzion, che duncje e presupon une distruzion precedente. Di fat, dopo la prime ricostruzion fate a pene finide la seconde vuere mondiâl, che e veve pestât fuart ancje in regjon e dopo la seconde tal indoman dal Orcolat dai 6 di Mai dal 1976 che e à ben scjassât il Friûl, e esist ancje une altre, plui resinte: il savoltament complet e struturâl dal sisteme economic, politic e adiriture sociâl des nestris comunitâts. Il test de introduzion al seminari al ripuartave: “In barbe a dutis lis narazions autocelebrativis, la regjon tal sô insiemi e il Friûl in particolâr, a son interessâts, zaromai di plui di vincj agns, di un declin struturâl plui che evident (in prin lûc demografic). … e il model di guvier regjonâl – no cate la grande cuantitât di bêçs che i teritoris a àn vût tai ultins agns, nol somee adat al Friûl, anzit al da une man par sfibrâlu ancjemò di plui. Prime di dut par resons struturâls (insediaments difondûts sedi residenziâls che produtîfs, diferencis ambientâls e storic linguistichis, policentrisim, e v.i.), di fat il Friûl al somee jessi par sô nature antitetic a ogni model centralizât: de Aquilee antighe ae ricostruzion post taramot, in Friûl il miôr al è stât otignût guviernant “cul” teritori pluitost che “sul” teritori”.
◆ Di dulà tornâ a partî? Il prof. Gabriele Pelizzari de Universitât statâl di Milan al à spiegât une vore ben che sot dal pont di viste storic no dome il paradigme di Aquilee paleocristiane al è un unicum tal panorame european e di dut l’Ocident, ma ancje che chei pilastris culturâi e identitaris a son ancjemò vuê une vore valits, modernis e in spiete di une vere rapresentance politiche. E come in chê volte Aquilee e je stade il centri di propulsion pal cristianisim in cheste aree e la lidrîs fuarte de Mitteleurope, vuê e je tornade a deventâ gjeostrategjiche, militarmentri, viodude la vuere in at te Ucraine, ma ancje in maniere identitarie par chei valôrs che a son tal DNA dal Ocident.
◆ Purtrop – parafrasant il professôr Pelizzari – la ete che o stin vivint e sta lant in forme acelerade viers une dismission di chei elements di specialitât che cun fature si jere rivâts a valorizâ e pupilâ. Ta chest nestri timp un pôc dapardut o sin daûr a fâ sù “non luoghi” che di fat a laran a scjafoiâ tradizions locâls imponint a ducj i stes siums, i stes desideris. O sin di front a une erosion costante e zaromai visibile des nestris identitâts. Bisugne invezit cirî lûcs e spazis culturâi par nature “resistents”. E il Friûl –simpri stant a Pelizzari – al à la pussibilitât e la ocasion no tant di oponisi ae globalizazion – nol varès sens – ma pluitost di savê cemût frontâle, cemût traviersâle. E chi lis lidrîs di Aquilee a son une fonde ineludibile, un substrât di specificitât unic che al à il so centri chi di nô e che ancje di altris bandis a scomencin a scuvierzilu
◆ La Regjon Pulie par esempli e sta finanziant progjets di ricercje sui rapuarts jenfri Aquilee e Alessandrie di Egjit che a cjapin dentri dut l’Adriatic. Cun di plui, la Fondazione Taranta dal president Braj si sta interessant ae “Furlane” su lis olmis dai studis e des intuizions di pre Gjilbert Pressac.
E in Regjon F-VJ, o, miôr, in Friûl?
◆ Nuie, chescj studis no son di fâ. Al massim si discut, te prossime riforme des areis vastis, se passâ Aquilee de Provincie di Udin a chê di Gurize.
Nus pâr che Aquilee e stedi passant te provincie di Lecce. ❚