La storie di Elisa: de citât ae mont di Lauc par meti su un agriturisim a “km 0”

O sin tornâts tal comun di Lauc, cheste volte par cognossi di dongje la ativitât metude in pîts de zovine Elisa Cimolai. “A 16 agns – e conte Elisa – o jeri vignude in Cjargne par passâ lis vacancis estivis a Sauris. O soi lade a cjaminâ cuntune amie e o sin rivadis inte malghe ‘Casera Razzo’. O ai cognossût Tiziano Cimenti (il malgâr) e mi soi fermade alì. Dopo doi agns o soi vignude a vivi in Cjargne. Chest an a son dodis agns che o soi achì!
◆ La idee di vierzi cheste ativitât nus è nassude cuant che mê madone e veve in gjestion ‘Casera Razzo’, indulà che e vendeve formadis. Vie pal Invier e tignive viert dome i fins di setemane e spes intai dîs che il spaç al jere sierât la int nus vignive a cirî in cjase a Lauc. Par solit a rivavin cuant che o stavin mangjant e no nus plaseve trop cheste modalitât. Alore sul imprin nus è vignude la idee di vierzi un spaç di formadi achì a Lauc. Intant che o jerin daûr a pensâ su chest progjet, o vin decidût di butâsi e cussì o fat ancje l’agriturisim: o vin fat il licôf tal mês di Novembar dal 2023. Fint cumò o sin contents di cheste ativitât.
◆ Tal spaç si cjatin i formadis e robe insacade che o fasin nô e cualchi altri prodot di altris aziendis agriculis di chenti ator. Tal agriturisim il menù che o proponin al è sempliç e gjenuin e la plui part dai ingredients che o doprìn a son di produzion nestre. O fasin cjarsons, fricos, luianie fumade e v.i. e jo o soi la coghe.”
◆ Elisa e à dôs dipendentis fissis dut il timp dal an e une zovine che ur va a dâ une man cuant che e à plui int a mangjâ.
◆ La dipendente plui zovine si ocupe ancje di inzornâ lis pagjinis sui socials Facebook e Instagram: une maniere par contâ ce che al capite intal locâi di Lauc, in vie Capoluogo 85.
◆ “La prenotazion e je simpri conseade – e dîs Elisa – soredut di Invier, parcè che o ai une salute interne che e ten 19 personis al massim. Chest an la presince estive e je stade plui alte che no l’an passât e o vin vût ancje un grum di forescj (de Belgjiche, France, Austrie e Slovenie).”
◆ Elisa e à molât la citât par vignî a vivi in Cjargne e cuant che i domandi se e à dificoltâts pal fat di jessi a stâ in mont, mi fâs capî che no ‘nd è, se di no… no vivarès achì. Mi dîs “La uniche note stonade e je la burocrazie che nus compliche la vite e nus domande tant timp par stâi daûr. Prin o stavi a Fontanefrede ma no sint la mancjance de citât. No mi mancje il fat di vê ducj i servizis dongje, no sint la mancjance dal caos, anzit! Cuant che o voi a cjatâ i miei, mi ven l’ingôs dome a fâ la strade di rive jù… jo o stoi benon achì. O dîs simpri che la mê vocazion e jere a ca sù! No pues nancje pensâ di tornâ a vivi in citât!” ❚