Dino Virgili, gnove edizion firmade di Davide Turello

L’an passât Davide Turello al à curât une edizion des “Letaris ai furlans” di pre Bepo Marchet insiorade di notis e coments che “La Patrie dal Friûl” e à publicât inte sô golaine “La machine dal timp”. Chest an al è lât indevant cuntun altri “classicon” de leterature furlane, “L’aghe dapît la cleve” di Mario Virgili, che al è jessût in gracie de Filologjiche e dal Comun di Martignà, in ocasion dai 100 agns de nassite dal autôr, e che al è stat presentât inte Biblioteche Joppi vinars ai 5 di Setembar
◆ La maniere miôr di riatualizâ i classics e je “voltâju” intune lenghe che ju puarti in sintonie cun cui che al lei. E cheste filosofie e vuide la azion di Davide Turello, “cerviel scjampât” che tai ultins agns – si ben che la so cariere academiche lu à puartât inaltrò, ae universitât di Bamberg, in Gjermanie, si sta intivant te ripublicazion resonade di oparis che a stan ae fonde de leterature furlane.
◆ Noaltris de “Patrie” o sìn stâts braurôs cuant che Turello al à sielt di partî, in chest percors di valorizazion dal tesaur de nestre scriture creative, propit di pre Bepo Marchet, fondadôr di chest gjornâl. Par chest o vin volût publicâ adun cu la Arlef e il Comun di Glemone la so edizion des “Letaris ai furlans” di Giuseppe Marchetti, cun notis in detai rispiet aes peraulis che vuê – massime pai zovins – no son cussì facilis di capî. Cheste modalitât di analisi e ven replicade vuê sul romanç che al à screade la narative in marilenghe, “L’aghe dapît la cleve”, che Dino Virgili al publicà a pontadis dal 1951 al 1955. Une “conte d’amôr”, le à definide l’autôr – cussì ben fate che ancjemò e sburte a interpretazions diferentis. Lavorant su lis peraulis e sclarint a dimplen la lôr fuarce espressive, Turello al dà gnûf respîr a une narazion in trê moviments che e piture un fresc dinamic e vivarôs de societât contadine che prin il boom economic e po il taramot a àn fat sparî par simpri. Cuissà che “il model Turello” nol vegni doprât di qualchi altri zovin studiôs par dâ gnove vite ai nestris classics, e gnove dignitât ae nestre leterature. ❚