Paulâr e la Cjargne dal fassisim ae liberazion. Il gnûf libri di Gianni Oberto

Al è jessût un gnûf libri di Gianni Oberto, cultôr di storie locâl dal Cjanâl di Incjaroi une vore apassionât de storie de sô tiere e de Cjargne in gjenerâl, e al è stât a pene presentât, propit intal so paîs, Paulâr. Al è scrit par talian, ma il titul achì lu voltìn par furlan: “Paulâr e la Cjargne. Dal venteni fassist ae liberazion. Documents e testemoneancis”. Dusinte e setante pagjinis penzis di storiis che lui al veve regjistrât, de vôs vive dai paularins e di altris cjargnei, intai agns Novante e tai prins di chest secul, che cumò al à metût in ordin, sbobinât e trascrit. A descrivin la vite di ogni dì sot dal regjim fassist e intant de seconde Grande Vuere tai cjanâi de Cjargne, a contin di Balilla e Piccole italiane, cjamesis neris e partigjans, di vuere, miserie, emigrazion, internaments e batudis come la vignude dai cosacs. A insiorin dut articui di gjornâi dal timp, documents dal Archivi di Stât di Udin, fotografiis dal archivi dai Segalla e altris documents impuartants di fonts privadis.
◆ De leture di cheste sô ultime fadie – stant che Oberto si ere za dedicât a chest teme intai volums (titui voltâts par furlan): “Batudis a Paulâr tal 1944” e “Gavetis e ricuarts. 1940-1945. Soldâts paularins al front” – a cjapin soredut lis vôs de int di popul.
◆ Dionisio Sbrizzai, Giovanni Nascimbeni, Ines Reputin, Ugo Gortan, Beatrice Clama e tante, tante altre int, cualchidun ancjemò cun nô, cualchidun disparît, a contin di robis che a fasin vignî i pêi drets, soredut tai agns de vuere. Ognidun al veve di rangjâsi, cirint di no scomodâ nissun e soredut di no pandi brutis vôs par no pierdi la reputazion, che tantis voltis al voleve dî l’onôr, e ancje la vite.
◆ Si conte di int pestade, int copade cun esecuzions improvisis, robariis, violencis e stupris, fughis, reclutaments, deportazions, mai une dì passade in pâs, se no dopo la liberazion.
◆ “Mucio” che al conte dal servizi militâr, de Albanie, de Polonie ai lavôrs sfuarçâts, de Gjermanie e de tornade a cjase, salf cuintri di ogni spiete. Rine cu lis amiis e faseve viaçs luncs jù pal Friûl a vendi tiessûts e linzûi par vê il forment, tra mil pericui; i Moros lâts a finî a vivi in Libie; la “Panzine” violentade a tredis agns parcè che il fradi di sedis si jere arolât inte Republiche sociâl taliane, e si podarès lâ indenant a lunc.
◆ Sensibil e atent, Gianni Oberto al à preferît no jentrâ tal merit di chestis testemoneancis, ma lassâ al letôr la libertât dal judizi, in maniere che lis peraulis che al à cjapât sù cul so regjistradôr a fasessin il lôr servizi in forme scrite. Tantis e significativis lis fotografiis, che dispès a contin plui di tantis peraulis, ben incuadradis però tal contest gjenerâl dai argoments tratâts.
◆ Cui che al fos interessât a vê il libri, al pues domandâlu in maniere direte al autôr Gianni Oberto. Chi la sô e-mail: obertogianni@hotmail.it. ❚