Interviste cun Toni Buian, za president de cooperative editore di Radio Onde Furlane e di tantis iniziativis par pupilâ la lenghe furlane
Antonio Buiani/Toni Buian al è nassût intal 1946 a Remanzâs. Al è stât motôr di tantis iniziativis pe lenghe furlane, e al è stât president de cooperative Informazion Furlane, editore di Radio Onde Furlane, e de Serling (SERvizis LINGuistics) e Claap (Centri di Linguistiche Aplicade Agnul Pitane), societât cooperative par furnî servizis linguistics professionâi in lenghe furlane tant che traduzions, redazion di dizionaris, elaborazion di struments di linguistiche computazionâl e editorie.
_
Toni, ce ambient jerial Remanzâs cuant che tu jeris frut?
Un ambient li che in paîs e dulintor si fevelave cuasi nome par furlan. Il prin impat cu la lenghe taliane al jere cu lis scuelutis e scuelis dal Stât Talian. O ai vût cualchi dificoltât aes mediis cu la lenghe taliane scrite, intant che in chês altris materiis (soredut il latin) o levi benon. A un ciert pont la professore di letaris i sugjerì a mê mari di comprâmi la Gazzetta dello Sport, stant che o jeri apassionât di sport. In chê volte “la rosea” e jere siore di bielis firmis, e cussì o ai tacât a miorâ ancje in talian scrit.
_
A proposit di leturis, ti visistu de prime volte che tu âs let alc par furlan?
Pre ‘Sef Cjargnel (Giuseppe Cargnello, membri storic di Glesie Furlane e grant musicolic, che nus à lassâts intal 2017 ndr) al jere di Remanzâs, e sô mari e vignive avonde regolarmentri a meti dentri te buse des letaris «La Patrie dal Friûl». O pensi propit che e sedi chê li la mê prime leture par furlan.
_
E une sorte di “cussience furlane”, che il furlan al è une lenghe e chel furlan un popul, cuant ti ise vignude?
Ti fâs une premesse, parcè che no ai vût une iluminazion specifiche fuarte, ma un pâr di episodis che mi àn fat pensâ. Lant indevant cui studis, ancje se mi plaseve Storie e Leterature, mi soi diplomât perît edîl al Malignani e o soi stât sedis agns fûr dal Friûl. Par restâ su la tô domande, a son doi episodis banâi, doi incuintris cun personis furlanis sul lavôr, un in Toscane e un in Afriche. Il prin al jere un dirigjent dal ENEL a Florence e il secont al veve une grande imprese di marangon a Douala, in Camerun. Il rapuart di lavôr al veve di jessi seri, parcè che al compuartave efiets economics impuartants, ma cuant che di doi boss a restavin nome Olivo e Floreani, alore e sclopave la furlanetât, une sorte di confidence, di complicitât che a fasin pensâ a une cussience identitarie, di popul. Ve, al è stât li che mi è tacade a balinâ tal cjâf la idee che o jerin un popul, che al saveve ricognossisi.
_
E cuant che tu sês tornât in Friûl?
Tornât “cjase”, o ai vude une piçule esperience di lavôr come perît edîl tal puart di Triest e dopo o ai cambiât dal dut setôr lavoratîf. Cun cualchi amì o vin viert une cooperative librarie a Padue e di in chê volte la mê ativitât e je stade te distribuzion e te editorie.
_
Stant che tu âs fat il distributôr, mi ven la curiositât di domandâti cuai che a jerin i libris par furlan che a lavin di plui. E cui sono i autôrs che ti plaseve lei?
No mi visi di un titul in particolâr, ma ti pues dî che i furlans a compravin tant i dizionaris, che par me al è un indicadôr di un popul che al è interessât ae sô lenghe, che a ’nt vûl savê di plui par fevelâle miôr. Come leturis, jo o soi tant apassionât di toponomastiche e o citi Giovanni Frau, che i soi agrât e lu stimi tant di studiôs, ma ancje par tantis colaborazions che nus àn volût cjapâ dentri tai agns. Ancje cuant che i siei libris e saçs a son scrits par talian, ti fasin vignî fûr la bielece e la braùre dal jessi furlans. Un altri grant studiôs che al à scrit par talian al è Gianfranco D’Aronco, e ancje li mi ven di calcolâlu leterature furlane parcè che al da lûs a tantis oparis in lenghe. Come che si viôt, no soi om di leturis par straviâsi tant che i romançs, ma o pues citâ juste Dino Virgili cu «L’aghe da pît la cleve» (un classic) e Franco Marchetta e Ivano Urli. Tai poetis o nomeni Eusebi Stele (“poete improibît” dal ‘600), Pasolini e Federico Tavan tai contemporanis. Insume, forsit si dimostre un caratar furlan tal preseâ di plui leturis che ti dan informazions plui che di fantasie. Libris tant che «Storie dal popul furlan» di Pieri Piçul, o di pre Josef Marchet la gramatiche e i siei studis su la art furlane. Une biele leture e je «Il scuvierzimi furlan» di pre Guido Maghet. Par finî o volarès citâ un altri libri par talian e di un che nol jere furlan, ma che lu conseave Zorç Jus: «Se o volês savê ce che al è il Friûl, o vês di lei L’eredità europea del Patriarcato di Aquileia» di Arduino Cremonesi, nassût a Flum ma che al à vivût e insegnât ca.
_
Jessint la storie une tô passion, cuâi sono i mestris tal cjamp?
Gian Carlo Menis, il classic, Gilberto Pressacco pe sô origjinalitât e inovazion di pinsîr, e Renato Iacumin pal so grant lavôr su Aquilee.
_
E in cjamp politic ise stade cualchi figure impuartante pal Friûl?
Dal sigûr Tessitori, che al jere te Costituente e che al à fat saltâ fûr il Friûl e il furlan te Costituzion taliane, ancje se – magari cussì no – nol à rivât a fâ la Regjon Friûl. Po dopo, ben si intint cui lôr difiets e erôrs, di politics che di resint a àn fat alc pal Friûl ti fâs i nons dai presidents di Regjon e Provincie: Sergio Cecotti, Pietro Fontanini, Alessandra Guerra e Marzio Strassoldo _
Jessint stât president di une cooperative di informazion tant che Onde Furlane, ti domandi cualchi mestri di gjornalisim par furlan.
Dal sigûr Mauro Tosoni, che o leievi cun tant gust te In Vuaite, e ancje te radio al à fat un grant lavôr. Po dopo par tantis robis Federico Rossi/Fidrì dai Ros, e par fâ un non di un zovin mi plâs Natascia Gargano cumò in RAI, ma in passât colaboradore de Patrie dal Friûl. Propit brave. E se o metìn la satire tal cjamp dal gjornalisim, o nomeni Riedo Puppo.
_
Tu âs fat ancje cors di furlan: âstu vût un mestri?
O ai imparât tant di Gianni Nazzi e Sandri Carrozzo, mestris tal tratâ la lenghe cun serietât e precision, lontan dal furlan sdavasson che si dopre dispès. Pal fat de precision tal fevelâ par furlan, mi visi di Agnul Pitane; scoltant Onde Furlane, nus marcave, scrivintju suntun sfuei, i tancj fai di pronunzie dai speakers. Une lezion continue.
_
Un mestri ideologjic?
Un che par me al jere un grant om, al è Achille Tellini. Al è stât ancje studiôs e linguist, ma no nome chel: al è di chei che ti svein dentri. Un cussì al jere Arnalt Baracêt, che mi telefonave di matine adore par sburtâ a fâ robis pal Friûl. E nol molave, ti tontonave, ti sburtave!
E dopo mi plâs nomenâ un “mestri provocatori” tant che Marc Tibaldi, che al à ancje firmât di diretôr da La Patrie dal Friûl, pal so lavôr cun Usmis, pal ambient, pe musiche: un agjitadôr culturâl di gale. Un altri “provocadôr” in maniere positive al è Sandri Di Sualt/Alessandro d’Osualdo.
__
Ultime domande, un personaç o opare che par te al varès di jessi valutât di plui.
O fâs fature a fevelâ di mestris innomenâts parcè che te mê vite chel che mi à insegnât tant al è l’incuintri cun tante int normâl: librârs, professôrs, mecanics e vie indevant. Un di chescj al è Rem Spicemei, di Visepente: un om che ogni volte che tu fevelis cun lui ti da sugjeriments par riflessions origjinâls sul Friûl. Al è ancje obietôr fiscâl, nol paie di pueste la percentuâl des tassis che e va aes spesis militârs. Al è un di chei che ancjemò cumò si cjatin in maniere periodiche a Rivolt cun chê di manifestâ par dî che no son ducj pe retoriche des Frecis Tricolôrs. ❚
…………………………………………………..
FOCUS. Il personaç
Achille Tellini/Achîl Telin (Udin 1866 – Udin 1938).
Fi di Giovanni Battista Tellini e di Vittoria Pasini Vianello, si laureà une vore zovin a Turin. Al insegnà inte Regia Università La Sapienza di Rome e tal Regio Istituto Tecnico ‘A. Zanon’ di Udin. In plui dai studis gjeologjics, speleologjics, paleontologjics, gjeografics e naturalistics – in gran part dedicâts al Friûl – si impegnà te linguistiche, te glotologjie e te etnografie. Al è stât autôr di cetantis publicazions, dispès publicadis in propri. Tal 1916 al fo acusât di jessi une spie a pro de Austrie, par vie di une letare circolâr che al veve mandade ai plevans e ai segretaris comunâi dal Friûl par cjapâ sù informazions sul ûs corint dal furlan. Al fo incuisît e denunziât al Tribunâl di Vuere. Lu someterin a controi strents e la sô opare e fo censurade, ma nol bandonà mai nissun dai siei interès. Tal Novembar dal 1917, al scriveve che, pai siei ideâi, vâl a dî la furlanetât, la unitât e la nazion ladine al jere disponût a patî «la indiference, la derision e… piês». Al cjapà part fin dai prins dal ‘900 al moviment esperantist, parcè che une lenghe universâl e varès garantide la pâs, prudelât i scambis culturâi, il turisim e il cumierç. Anticipadôr dai timps, al metè fûr la idee de creazion a Udin di une universitât pai ladins. ❚
