“Truóis e Gòtes”: un cjant a dôs vôs pe tiere, pe lenghe e pe memorie

Dôs stradis musicâls diviersis, ma destinadis a incrosâsi. Cussì al nas “Truóis e Gòtes”, il gnûf album condividût di Franco Giordani e Alvise Nodale, dôs vôs e artiscj straordenaris che di agns a contin il Friûl cun sensibilitâts complementârs. Il prin, Franco Giordani, cun lidrîs tal rock di autôr, il secont, Alvise Nodale, cuntun leam salt cu la musiche folk e la ricercje etnografiche. Unîts de stime reciproche e di une vision artistiche comune, a àn tacât un progjet dulà che lis diferencis si fondin intune identitât sonore coerente e vive.
◆ «O ai preseât di subit il stîl di Alvise, il so mut di scrivi e cjantâ», al conte Franco. «Al è stât naturâl colaborâ – Alvise al conferme – Franco mi à simpri lassât spazi tai siei concierts, fin a rivâ a condividi un spetacul intîr, come tal disc. E je nassude une grande intese che e dure di agns». Ju unìs ancje la evoluzion naturâl viers l’acustic, la lôr lenghe e tiere: «Cuant che si sin cognossûts, o stavin ducj e doi scomençant un percors plui intim e leât ae nestre tiere», a ricuardin.
◆ Il titul “Truóis e Gòtes” al cjape il non dai lôr prins lavôrs fats di soliscj (“Truòisparìs” e “Gòtes”), simbul di une union che e rispiete lis lidrîs individuâls. L’album al cjante di storiis dismenteadis, paîs abandonâts, figuris come Ruggero Grava. Al è un disc che al fevele di memorie e identitât. «No vin mai di pierdi il contat cu lis lidrîs – a zontin – intun mont globalizât, al covente ricognossisi».
◆ In chest, la lenghe furlane e je protagoniste assolude: no je dome une sielte strategjiche, ma une espression spontanie e inlidrisade, che e nas di un leam profont cu la tiere e la memorie coletive.
◆ Tra i moments plui intens dal disc, e risalte la regjistrazion dal vîf te grote di San Zuan dal Landri (Pulfar): un lûc di fuarce simboliche grande. «Sunâ li al è stât emozionant. O vin cirût di rispietâ il lûc e il so spirt», al conte Franco. «Un puest cussì al devente protagonist», al zonte Alvise. La acustiche naturâl e la atmosfere cuasi liturgjiche a àn dât une gnove profonditât aes cjançons.
◆ A vierzi l’album, però, al è un toc inedit regjistrât in studi: “A se vêc sempre la luna”, ispirât a La luna e i falò di Pavese e a Fernando Pessoa. Scrit te variante di Claut, al riflet sul abandon dai piçûi paîs e su la nostalgjie. «Si domandìn se o vin fat ben a lâ vie. Ma no vin une rispueste», a ricognossin.
◆ Dedicât ae memorie di Giorgio Olmoti, presince discrete ma fondamentâl, l’album, di undis tocs, al riflet un spirt di condivision che si slargje ae colaborazion cun Nicole Coceancig e Leo Virgili. Intun panorame musicâl ristret come chel furlan, la union tra afinitâts personâls e intesis artistichis e devente une risorse preziose e necessarie par dâ fuarce e continuitât ae creativitât coletive.
◆ E tal futûr? Franco al cjale za a gnovis colaborazions par contâ altris storiis dismenteadis. Alvise invezit al è impegnat cul tris Trivàl, dedicât ai cjants popolârs furlans. Lis ideis no mancjin, la energjie tant mancul.
“Truóis e Gòtes” al è disponibil su nota.it, su francogiordani.com e sui canâi sociâi dai artiscj. O podês scoltâ chest biel progjet dal vîf ai 22 di Avost e ai 7 di Setembar, a Claut, il paîs là che al è nassût Franco: «là dulà che si viôt ancjemò la lune». ❚