“Al è strani che dut ta chest mont al vedi di vê un so puest, une sô catalogazion. Mi somee cuasi che o sedin ducj part di un catalic gjenerâl di personis. Mi clami Ivan Corsi, in paîs però ducj mi clamin ‘ics’, in paîs o vin ducj non cognon e sorenon. Soi nassût a Nadâl dal 1973, o ai cuasi trentedoi agns e mi cres la panze. Subit o sarai fûr da la fasse che interesse ai sondaçs”.
◆ Al è un librut di cincuante pagjinis, piçul (17 par 12 cm), che al fâs part de golaine Cormôr salvadi. A son vincjedoi cuadris che a descrivin un paîs dal Friûl che, come ducj i paîs, al à i siei vizis, lis sôs bielecis, lis sôs contradizions, ma ancje il so gust di vivi; al è fat di stradis, bars (ostariis), une glesie, ma, soredut, al è fat di oms e di feminis. Bertòs ju caraterize cun simpatie e ancje cun ironie: il muredôr che si dismentee la betoniere inte cjase a pene finide e nol è plui in stât di tirâle fûr par vie che no passe pes puartis; il puestin che al sberle di lontan i nons e il cjanat che i va simpri daûr a dâi seont; Zuane che e je a stâ li dal 50 (lei la pagjine 23 par capî); Sergjo che, cuant al mande in mone cualchidun, i da dal lui, la educazion prime di dut; la none che e je plui psicolighe di sô gnece che e je daûr a studiâ psicologjie; Tarcisio che al rive tor dîs parcè che, prime, al à di molzi; il Vont che al tire su trê cjochis in dì; Evaristo che i puarte i San Martins a Zuane, ma cui sa dulà che ju cjol! (si sa, si sa…); Artisio, il comunist che si fâs paiâ simpri doi mil e cinc, no impuarte ce che tu âs bevût. E che al è in buinis cul plevan, ancje se nol va al so funerâl. Tilio e Pieri che a fasin part de mobilie dal bar e v.i. Insome chest “ics” nus sigure cualchi ridade di gust. Ma nol mancje nancje cualchi moment di riflession: a son di chei intal mont che a son puars par colpe nestre che o sin siôrs e, alore, se ur mandìn alc, cuatri palanchis che o cjapìn sù cu la racuelte di ferace e peçotis ator pal paîs, no ur fasìn la caretât, ma dome ur tornìn alc di ce che ur vin robât.
◆ La introduzion e je di Stefania Nonino, la cuviertine e je dissegnade dai autôr stes. Al reste un dubi: chest paîs esistial pardabon? E dulà saressial? ❚
