Edizion numar 34 pe storiche manifestazion
cun concierts dilunc dut l’Istât
Adiriture cuaranteun concierts, di joibe ai 26 di Jugn fin sabide ai 6 di Setembar, tra Cjargne, Valcjanâl e Cjanâl dal Fier, cuntun apontament ancje a Nova Gorica. Un cartelon siôr, come che nus à usât aromai di trentecuatri agns incà il festival de mont furlane, che al conte la storie di Carniarmonie. Une storie che e je un dut un cul so public, vari e vivarôs, cu la int dai paîs che e ospite i concierts, cu lis realtâts culturâls dai lûcs e cui artiscj, ecelencis furlanis e internazionâls. Tra lis particolaritâts di cheste rassegne storiche e je la comunion ideâl tra la musiche sielte e lis sedis sieltis: plêfs, glesiis, domos, badiis, museus, salis, palaçs, teatris, lûcs tal viert. In cheste armonie a son vincjevot comuns de mont, insiemi par realizâ cheste propueste che e je une di chês plui seguidis, buine di incressi il turisim culturâl che al è al stes timp locâl e globâl, cun diviersis utencis che a vegnin ancje dal forest.
◆ A contâ lis novitâts al è il diretôr artistic Claudio Mansutti: «Oltri aes formulis tradizionâls che a plasin tant al nestri public, chest an o vin il plasê di ospitâ in residence artistiche un dai cuartets talians tra i plui innomenâts a nivel internazionâl. Al è il cuartet di arcs Indaco che al proponarà un lavôr incrosât cun chel de Fvg Orchestra, intun conciert che al è sinfonic e tal stes moment cjamaristic. Cun di plui, par valorizâ i miôr musiciscj furlans e no dome, a vignaran realizâts sîs concierts cun formazions che a son stadis selezionadis in gracie dal Cors di alt perfezionament di musiche di cjamare de Fondazion Bon, tignût de professore Federica Repini. Un mût concret par inviâ al professionisim i nestris talents».
◆ La scree di gale di Carniarmonie e je stade fate ai 26 di Jugn tal Teatri Candoni di Tumieç cu la Fvg Orchestra, la violiniste Maria Solozobova e la direzion di Florian Krumpöck. Il secont grant apontament, che al vierç une programazion di cuasi un conciert in dì fin a Setembar, al è vinars ai 4 di Lui tal Domo di Paluce, cul ensemble Indicato e ancjemò une volte cu la Fvg Orchestra, par eseguî un grant repertori cun Sostakovich e Tchaikovsky.
◆ Tantis lis colaborazions de manifestazion cun diviersis realtâts de regjon, talianis e internazionâls, come l’Ent Regjonâl Teatrâl dal Friûl-Vignesie Julie, i festivai Nei Suoni dei Luighi, Anciuti Music Festival, Risonanze Festival, Vicino Lontano, il Côr dal Friûl-Vignesie Julie, Simularte, Rime Mute, par une grande intese che e ponte a ufrî, cun risultâts sigûrs, un sielte di propuestis musicâls largje, dai grancj repertoris di musiche culte, ae etniche, al jazz, ae contemporanie e clâr ae musiche furlane.
◆ In chest sens nus plâs segnalâ cualchi apontament, tra i tancj in program che a valorizin lis produzion furlanis e par furlan (par plui informazions, viodi su carniarmonie.it e su lis pagjinis social dal festival). O vin il progjet Zhora de cjantautore Nicole Coceancig insiemi a un grant grup strumentâl, che al vignarà presentât ai 5 di Avost a Fors Disot. Di no pierdi l’omaç a Claudia Grimaz, artiste furlane di grant talent e che nus à lassâts masse buinore, cuntune sielte di ospits e amîs insiemi in “Une femine in/cjant”, chest ai 6 di Avost tal Museu Cjargnel di Tumieç, cuant che al vignarà ancje presentât il libri “Tutto nuovo 5”, in colaborazion cul editôr Kappa Vu e cu la Biblioteche civiche Adriana Pittoni, che al à dentri un cd, dedicât ae Grimaz. E ancjemò, il progjet Lyra dedicât a Pasolini tal cincuantesim de sô muart, cun Elsa Martin e Stefano Battaglia. Ma lant a cjalâ ben il cartelon, a son cetancj artiscj furlans, tra soliscj e insiemis, dentri di cheste gnove edizion di Carniarmonie. Di simpri il festival al promôf altris manifestazions che si tegnin in Cjargne tal periodi, e tra chestis l’Avost Archeologjic de Cjargne e La Lungje Gnot des Plêfs in Cjargne, che dai 22 ai 24 di Avost e ospitarà in cinc plêfs (Cesclans, Cjanive di Tumieç, Guart, Vile di Verzegnis e Castoie di Soclêf, ancjetancj concierts cun côrs dal Friûl, de Austrie e de Slovenie, e degustazions cun prodots tipics dal teritori.
◆ Une grande famee Carniarmonie, une siore organizazion par grancj concierts, bogns di tignî dongje diviersis gjenerazions e di apaiâ ducj i guscj. ❚
