Interviste cun Enos Costantini, grant divulgadôr
di culture furlane, contadine e no dome
Enos Costantini, classe 1949, nassût a Osôf, al è un dai scritôrs e editorialiscj che al contribuìs di plui tal contâ il Friûl contadin e produtîf di une volte e chel di vuê. Dut cuntune prose simpri gjoldibile e ironiche, sedi par talian che in lenghe furlane.
Laureât in Siencis agrariis a Padue, al à insegnât Agronomie e Zootecnie tal Istitût Tecnic Agrari di Cividât dal 1976 al 2006. A son une vore i siei libris sul rapuart tra agriculture e ambient, su lis produzions tipichis, su la storie de agriculture e su la biodiversitât coltivade. Tantis che mai ancje lis colaborazions cun gjornâi e cui media sedi locâi che di dute la Italie.
Di dut chest grum di lavôr o citi la mê preference: l’editoriâl setemanâl inte trasmission «Vita nei campi» di Rai3 F-VJ; la cure redazionâl de biele riviste «Tiere Furlane», produsude de Regjon Friûl-Vignesie Julie e che magari cussì no ven plui publicade; il libri «I cognomi del Friuli» (Lithostampa, 2019): pardabon un viaç inte storie midiant dai cognons de Patrie.
La sô ultime publicazion e je «Arbui furlans» (ed. Università della terza età dello spilimberghese Aps), une sorte di storie dal Friûl contade cu la storie dai siei arbui.
_
Enos, in ce ambient sêstu cressût dal pont di viste de lenghe furlane?
O soi nassût a Osôf e ae etât 7 agns si sin trasferîts a Trasaghis, dulà che o ai fat lis scuelis elementârs, lis mediis lis ai fatis a Glemone. Po dopo o ai studiât agrarie a Cividât e mi soi laureât a Padue. Dal sigûr, sedi la mê famee, che dut l’ambient ator di me al jere furlanofon, e o pues dî che ancje a scuele no jerin problemis a fevelâ par furlan tai coridôrs o ancje in classe. Fale che par un episodi: un professôr di tecniche a Cividât – furlan, ben si intint – mi disè di dut e mi metè un vôt brut te sô materie parcè che o fevelavi par furlan. Ma cuant che al à scuvierzût che in talian o jeri il miôr de classe, al à scugnût molâ (al rît, ndr).
_
E cun dute cheste imersion linguistiche, cuant ti ise maduride la cussience plene che il furlan al sedi une lenghe e chel furlan un popul ad implen?
La cussience le ai simpri vude parcè che di piçul, cuant che o fasevi la scuele medie, nus rivave a cjase la Patrie dal Friûl! Sì, propit il vuestri mensîl, anzit chel che in chê volte a fasevin pre Josef “Bepo” Marchet e Felix Marchi. Duncje mi soi imbombât di chê furlanetât militante. Ai timps o jeri in pratiche un indipendentist, tant di fâ scjassâ il cjâf a gno pari che mi calcolave masse estremist.
_
E i prins scrits par furlan cuant sono vignûts?
O ai tacât cun cualchi robe piçule par Int furlane, sul gjenar des letaris al diretôr. E dopo o ai vût scrit alc par Friuli Oggi. Po dopo o colaborât cun In Vuaite e Sot la nape. Di in chê volte no ai plui molât: in gjenerâl o ai scrit simpri sedi par furlan che par talian (purtrop) in maniere indiferente. E o voi indevant ancje cumò cussì.
_
Âstu vût un model di scriture?
Tant che mestris di scriture, dal sigûr leìnt la Patrie dal Friûl, o ai di citâ prin di dut Josef Marchet, pre Bepo, ma il gno vêr mestri di stîl al è Giovan Battista Corgnali, grant studiôs e diretôr de biblioteche “Joppi” di Udin. Biblioteche dulà che al passave la plui part dal timp, e jere deventade in pratiche la sô cjase. I tescj che al studiave li a jerin fonde dai siei articui, che a vevin la carateristiche di jessi curts e cuntun furlan “in ponte di cutuardis”, come che si dîs par furlan: al jere un pietin che a dopravin i tiessidôrs une vore fin. Al è stât il gno model di scriture che ancjemò vuê mi ispiri.
Tant che leturis, Riedo Puppo, ancje Ippolito Nievo par ciertis robis e, parcè di no, Pieri Çorut. Pasolini no, Pre Turoldo mancul di nuie. Tant che altris rivistis oltri ae Patrie, Sot la Nape e l’Avanti cul brun! che al veve tancj articui par talian, ma cun tante robe interessante par furlan.
_
Dal pont di viste “tecnic”, di un furlan “pûr” ise une figure di lei par imparâ?
O fasarès il non di Maria Forte par vie de sintassi e des espressions par furlan che e dopre. Cualchi volte forsit ancje in maniere che e pues someâ sfuarçade, ma se si vûl lei un furlan biel bisugnarès consultâle ogni tant, compagn che il Pirona.
_
Stant che tu âs colaborât cun tantis rivistis furlanis, âstu un mestri di gjornalisim?
Dal sigûr: al è Chino Ermacora e la sô riviste «La Panarie, rivista friulana di arte e cultura». Il prin numar al è dal 1924: e jere une riviste tant gnove pe impagjinazion grafiche, ilustrade cuntune modernitât mai viodude e plene di contignûts, dosâts cun ecuilibri. E soredut e veve une carateristiche par me tant impuartante: e fevelave dal lavôr, e spiegave i mistîrs e i imprescj dai mistîrs, fasint culture traviers il contâ il lavôr des personis. Pensait nome al lessic in lenghe furlane che al tirave dongje descrivintju. Mi è coventade, ancjemò vuê (!), tant che model inte redazion di Tiere Furlane, la riviste de Regjon che o curavi la redazion.
_
Fevelant di storie, cui calcolistu di mestri?
Menis al è la suaze: ti met datis, popui, vueris… E dopo Tito Maniacco cul sô «I senzastoria. Storia del Friuli dalle origini al 1866» cui dissens di Ferruccio Montanari. Li al cîr di fâ une storie marxiste dal Friûl, secont me nol è rivât a fâlu ben, pûr che al veve un cjâf incredibil, ma e je une opare impuartante. E dopo Furio Bianco.
_
Altris figuris di segnalâ in altris setôrs?
Cornelio Cesare Desinan pe toponomastiche, che al vûl dî capî la tiere dulà che tu vivis, se no tu vâs ator cul cjâf tal sac. Traviers dai nons dai lûcs tu capissis la lenghe e la storie. Lui nus à dât un metodi di lavôr che cumò al è superât, però al à inviât la strade a tancj.
A proposit di teritori, un che cumò al à une vision uniche e profonde al è Moreno Baccichet.
_
E un mestri “ideologjic” cui podaressial jessi?
Une figure fondamentâl e je stade Sergio Salvi cui siei libris tant che «Le lingue tagliate». Un che nol jere furlan, ma che nus à confermât ce che o pensavin nô in nuce, e nus dave une vision adiriture internazionâl des minorancis. Po dopo dal sigûr Pre Checo Placerean, grant oratôr che ti dave la cjame, e pre Josef Marchet che, oltri a jessi un grant linguist e autôr, al jere ancje un grant ideolic.
_
A proposit di politiche, tu ce ti calcolistu? Autonomist? Indipendentist?
Tai agns o ai disvilupât un gno concet, che al è chel di bioregjon. Al è un concet di ecologjie, ma tal câs dal Friûl, rispiet a altris regjons, al è leât ae lenghe ae culture. Il mangjâ stes al è fâ culture. O sin un lûc unic par vegjetazion, terens, bestiis: a son chei dal Museu di Udin che a disin che la regjon che e à plui biodiversitât animâl e vegjetâl in Italie al è il Friûl. Dut chest intun teritori relativementri piçul che al à particolaritâts coerentis dentri dai siei confins biologjics. Il resonament che o fâs jo al è che tu âs di leâ culture, la salût, la agriculture e l’ambient, l’obietîf antropocentric al podarès jessi chel li. Che al à di jessi compit ancje de politiche. Cuntune batude, si podarès dî che o soi bioautonomist.
__
Ultime domande, un autôr o opare che a varessin di jessi valutâts di plui.
O fâs il non di une persone: Pietro De Cecco (“Pierin Cjandel”), che al jere il gno mestri di francês tes scuelis mediis. Dopo de scuele o lavi li di lui cun altris arlêfs, e nus insegnave tante robe de culture e storie furlanis. Mi visi di une sô barufe cu la Ciceri il prin dal an a Dalès, li che e jere lade a studiâ la fieste de coscrizion, cun lui che al acusave la Filologjiche Furlane di no jessi avonde furlaniste. Nol à scrit oparis, nol è un non famôs, ma o ai gust di ricuardâlu e cun lui o vuei ricuardâ ducj chei che a àn vût amôr pal Friûl trasmetint ai zovins i nestris valôrs. ❚
……………………………………………………………….
FOCUS. Il personaç
Giovan Battista Corgnali / Tite Cuargnâl
(Reane dal Roiâl 1887 – Udin 1956).
Laureât in jurisprudence te Universitât dai studis di Padue intal 1914, al è stât diretôr de Biblioteche civiche “V. Joppi” di Udin dal 1924 al 1953. La biblioteche e fo il so lûc di lavôr, seconde cjase e laboratori pe sô ativitât di ricercje. I siei studis a son stâts fondamentâi pe redazion dal vocabolari «Il nuovo Pirona» (1935), un lavôr durât siet agns. Al è stât soci fondadôr de Societât Filologjiche Furlane. Insiemi cun Josef Marchet al à inviât la prose sientifiche dal furlan. I siei studis a son stâts ispirazion pe redazion di centenârs di articui su la lenghe, su la storie, su la gjeografie, su curiositâts e anedotiche che a tocjin il Friûl, tancj di chei vignûts fûr propit su la «Patrie dal Friûl» dal 1946 al 1956. Tancj materiâi che al à tirât dongje a son ancjemò no indagâts e no catalogâts, tant che chei dal so archivi personâl, donât ae biblioteche.
«Bibliotecari, inamorât de tiere e de lenghe furlanis», si lei su la sô lapide in cimitieri: peraulis che lu descrivin cu la modestie masse grande dal furlan tipic. Al è stât tant di plui. ❚