Staiar austriac, Staiar sloven

Za di cualchi mês incà, lis dôs regjons li che al è stât spartît il Ducât dal Staiar (nassût ai timps dal Barbarossa tal 1180 e ‘distudât’ tal 1919) a son in litighe. Cuistions di confin forsit? Par nuie: Austrie e Slovenie a son ducj i doi Paîs de UE e de NATO, cun di plui i interscambis comerciâi, culturâi e turistics a son pluitost vivarôs. Disìn che la politiche e sta metint la sô çate, riscjant magari cussì no di tornâ a tirâ fûr cantins che a àn a ce fâ cu la storie passade.
◆ Dut al è nassût par vie di un imni; no chel nazionâl, si capìs, ma ben chel regjonâl dal Staiar austriac, li che si met a clâr che il teritori stirian al rive fintremai ai doi flums Save e Drau. Il probleme al è che, jessint il test di cheste cjançon une vore antîc, i teritoris in cuistion a son cumò part de Republiche di Slovenie, dopo dai savoltaments des dôs Vueris mondiâls e il sfantament de Jugoslavie. Il guvier di centri-drete dal cjâf lûc Graz, vuidât dal governadôr Mario Kunasek dal partît Fpö, al à proponût di meti dentri in maniere uficiâl te costituzion regjonâl l’imni cemût che al è cumò.
◆ Tignût cont che il stes Kunasek al à criticât a fuart l’esecutîf di Lubiane par vie che (di là de minorance ongjarese e taliane) nol à mai ricognossût la minorance di lenghe gjermaniche tal nord de Slovenie, e je stade pronte la rispueste dal guvier di centriçampe dal premier Robert Golob te persone de ministre dai Afârs forescj e europeans Tanja Fajon. Il prin pas al è stât chel di sintî la ministre Beate Meinl-Reisinger, sô coleghe a Viene, par no butâ a Patràs il rapuart cetant bon jenfri i doi Paîs; dut câs, la Cjamare di Stât di Lubiane e je stade pronte a fâ buine ae unanimitât une declarazion uficiâl tant che at simbolic pe tutele de minorance slovene in Austrie. Cun di plui, al è in vore il Tratât di stât austriac dal 1955 li che si precise tal articul 7 la pupilance de minorance slovene (che e je presinte in Staiar e in Carinzie cun cirche 25 mil di lôr); di bande sô, za un pâr di agns indaûr la Slovenie e veve presentât une proteste tal Parlament european par criticâ il rispiet mancjât des normis nazionâls di bande de Austrie pe tutele de lenghe e de culture de minorance slovene, massime tal mont de istruzion. ❚