Provinciis. Roberti: “Femo pian, femo ben…”

Te interessante cunvigne de Associazion Tierce Ricostruzion fate a Aquilee ai 4 di Avrîl a pene stât, il guvier regjonâl al à finalmentri batût un colp. L’assessôr aes autonomiis locâls Roberti, competent in materie, dopo vê discorût in merit al “Serracchiani pinsîr” su lis UTI e la sparizion des provinciis (“su comant di une campagne demagogjiche dai socials cuintri dai coscj de politiche” – dissal) al à ilustrât la necessitât di un dibatit e di un confront fuart, cence sieraduris o posizions prejudiziâls e cence premure, su cemût meti in pîts di gnûfs lis areis vastis, come proviodût de leç statutarie che e je daûr a frontâ la dople leture tal parlament di Rome.
◆ E je une posizion che no si spietavisi cussì vierte, viodude la tentazion fuarte di cjapâ la scurte e tornà sic et simpliciter aes vecjis istituzions provinciâls. E invezit, l’assessôr triestin al à dit che al bisugne capî cualis competencis dâur ai gnûfs ents, dongje de edilizie scolastiche e de manutenzion des stradis che za par so cont – seont lui – a justificaressin istituzions eletivis, ven a stâi cun mandât rivât midiant di votazions di pueste dai citadins.
◆ E ancje se “cambiâ i confins des vecjis provinciis no i scjalde par nuie il cûr” si è adiriture mostrât disponibil a capî lis esigjencis dai diferents teritoris par svilupâ miôr i servizis pai citadins. E, di plui, al à palesât la volontât ineludibile de aministrazion regjonâl di delegâ aes gnovis areis vastis plui di cualchi competence che vuê e je in cjâf aes direzions regjonâls. Si vierç duncje une stagjon di discussions e di audizions, confermadis par altri ancje dal president de cuinte comission Diego Bernardis.
◆ Dal intervent dal rapresentant de zonte regjonâl, dut câs, nus pâr che par chescj ents si profili un destin dome di nature aministrative e no ancje di rapresentance identitarie (e politiche) dai teritoris. Nus somearès, al contrari, un obietîf une vore impuartant la valorizazion des diferentis zonis tal contest regjonâl. A partî de presince des minorancis linguistichis che in dì di vuê e je une des pocjis, se no la uniche, motivazion e justificazion dal statût di autonomie, che ancjemò nol à iniment di cheste sostanziâl presince ricognossude de leç 482/1999. Ce spietino a scrivilu neri su blanc te “costituzion” regjonâl? Il dibatit su lis areis vastis al podarès deventâ une buine ocasion par pensâ ancje a une riscriture dal pat di autonomie.
◆ No volaressin che cheste viertidure dal guvier regjonâl e fos dome un cjapâ timp, une meline par dopo, insom, dî che si scuen tornâ a restaurâ lis provinciis compagnis di une volte. E sarès une ocasion pierdude di dibatit e di confront politic che, par dî la veretât, vuê nus pâr un pôc lami.
In chel câs al sarès valit il sproc triestin: “Femo pian, femo ben…” ma soredut la sô finâl: “e se no podemo far ben, femo almeno pian…” ❚