Partît furlan o furlans tai partîts?

“Par vinci o vin di convinci”. Al diseve cussì un sproc famôs di Fausto Schiavi, conseîr regjonâl e president dal Moviment Friûl, un dai protagoniscj de rinassite autonomiste tai agns Sessante di chel altri secul. “O vin di convinci chei altris de bontât de nestre azion, cori denant parcè che chei altris nus corin daûr”. Al veve capît che par otignî risultâts politics nol bastave vê un partît autonomist, destinât a restâ minoritari, ma al coventave coinvolzi altris fuarcis sui temis fuarts des necessitâts de comunitât furlane che, in chê volte, a jerin la mancjance di oportunitâts economichis, la presince ossessionante des servitûts militârs, la plaie de emigrazion, la necessitât di une universitât a Udin e l’ecuilibri cun Triest che, par motîfs internazionâi, il Friûl al veve scugnût acetâ no dome di stâ insiemi ma ancje di sopuartâle come cjâf lûc. Il MF al veve interpretât a la garibaldine la sô funzion, detant te miôr maniere la scjalute dal dibatit politic in chei agns e i partîts talians a jerin stâts costrets a frontâ chês tematichis che la plui part a son stadis ancje risoltis. Dutis fûr che il rapuart cu la citât martare che, ore presint, tai agns dal “Io sono FVG”, al reste un gnerf scuviert.
◆ Di chê volte la strade dal autonomisim e je stade plene di alts e bas, soredut cul dubi: convegnial meti adun un partît autonomist, un moviment di racuelte, come che al è il Südtiroler Volkspartei (SVP), o pûr isal miôr sfuarçâ i partîts talians, che a son maioritaris, a deventâ plui furlaniscj? Nô o pensin che lis dôs opzions no sedin alternativis, ma che a puedin jessi cirudis dutis dôs. E sarès dal sigûr buine norme che simpri plui oms e feminis “furlaniscj” a jentredin tai partîts talians o padans puartant indenant lis cuistions impuartantis de nestre tiere che vuê a batin: la necessitât di pensâ a un model di svilup economic autocalibrât e compatibil cu lis esigjencis ambientâls e cui mudaments climatics; otignî plui competencis statutaris, par esempli su la scuele; tornâ a scrivi il statût de specialitât, metint in lûs la presince des trê minorancis linguistichis furlane, slovene e todescje, vêr fondament de nestre autonomie; il rûl internazionâl de regjon metude come che e je tal cûr de Europe; cjatâ une vie di jessude pai ents locâi, pai paîs che vuê a scombatin pal degrât urbanistic causât ancje di un declin demografic cence precedents e di une imigrazion extracomunitarie no simpri compatibile cul nestri tiessût sociâl. Cuistions che a fasin tremâ i zenoi e che si scugnarès frontâ cuntune vision “furlane”, ven a stâi doprant un “tamês” culturâl il plui dongje pussibil ae nestre Weltanschauung, al nestri mût di viodi il mont.
◆ In chest percors convertî il plui pussibil int, ancje di altris partîts, a cheste filosofie e je dal sigûr une buine azion. Ma la esperience nus dîs che cence un partît autonomist locâl che al vedi “dome” chescj obietîfs, prin o dopo lis alis furlanistis di chei partîts a son costretis a subî maiorancis talianis o padanis che a subordinin lis cuistions locâls a chês “nazionâls” – pal lôr ben si intint – plui impuartantis.
◆ Il câs de Lega Nord al è emblematic. Un moviment nassût dal bas che al veve federât une vore di partiduts locâi cul obietîf di fâ pesâ di plui a Rome lis cuistions dal Nord e che al veve puartât cun prepotence il federalisim tal dibatit politic talian fin in chê volte tabù, vuê al è deventât un partît talian a ducj i efiets e si è ridot a scombati pal puint sul Stret di Messine…
◆ Cence un moviment locâl presint tes istituzions dal teritori e il plui pussibil pesant, che al vedi une agjende politiche pragmatiche e finalizade, che al metedi in at une “intimidazion strategjiche” tai confronts dai podês centrâi, i risultâts pes nestris comunitâts a saran simpri sot dal podê di volontâts ugnulis e cence une continuitât che no si pues fâ di mancul. ❚