Cui aial pôre dal furlan?

Cualchidun inte citât di Pordenon si sta sustant pe toponomastiche bilengâl tai cartei stradâi. No je la prime volte che il moderni provincialisim de capitâl de Diestre Tiliment si fâs sintî tal demolî il Friûl come robe vecje e antistoriche in non di un cjalâ indenant economic e culturâl. O premet che la identitât e je variabile e duncje ognidun al pues sintîsi ce che al vûl. E duncje nuie ce dî se chei di Pordenon si sintin meneghei, o venits, o talians o fintremai angloamericans, viodude la vicinance di Davian. Un altri concet invezit al è chel di minorance. In chest câs, almancul pe leç taliane, linguistiche storiche, minorance al vûl dî un grup di personis che a son o che a pensin in mût diferent e che a son in numar di mancul a pet di chê che e je la maiorance. Duncje, se o sin dacuardi che ducj a à dirit di sintîsi a cjase lôr te tiere dulà che a àn simpri vivût ancje se a son in pôcs, alore ancje chei trê che a capissin e adiriture a cjacarin ancjemò par furlan in Comine o a Tor o a Vilegnove a àn dirit di viodisi ricognossude la lôr lenghe ancje tes indicazions stradâls. Che nol vûl dî che no vin di imparâ l’inglês, vuê lenghe veicolâr par antonomasie, ma nancje par chest refudâ la lenghe furlane intun teritori dulà che e je storichementri presinte, ancje se in misure minôr. Come il todesc a Sapade, o il sloven a Triest.
◆ Se nol passe chest concet, alore il stes Pordenon, che al è une minorance in Friûl e inte stesse Diestre Tiliment, nol varès nissun dirit di jessi rapresentât e di dî la sô te regjon. Chest al sarès une disgracie par ducj.
◆ E chescj concets di identitât, di minorance, di lenghe mari e lenghe veicolâr, di diversitât che a mostrin ricjece culturâl a àn di jentrâ tal mût di pensâ di ogni dì de int e des comunitâts. A son principis che a van insegnâts te scuele e che a van studiâts par ben par capîju e po metiju in pratiche. Nol baste lei, bisugne studiâ!
◆ Parcè che “Chi studia sa, chi non studia legge”, al diseve un gno amì.
E Pordenonelegge… mi pâr. ❚