“Dâ une definizion di art al è un esercizi dificil par vie che, sedi sul plan semantic, sedi su chel storic, sedi ancjemò su chel concret e funzionâl, la definizion di ‘art’ e il so significât a mudin vie pai secui in ducj i lôr aspiets”.
E je une afermazion evidente, nissun al disarès il contrari. Ma motivâle, cheste afermazion, cun tescj, documents, esemplis, riflessions… po ben, dome Fabian al podeve metisi!
◆ Cu la sgrimie di simpri, cu la competence che i ven dai miârs di libris lets, cu la passion pe lenghe furlane che al à bielzà mostrât cui siei libris che al va dilunc a stampâ in propri e a regalâju ai amîs e cognossints. E il debit de lenghe intai confronts di chest autôr al cres cul cressi dal so status di fevele in stât di dî robis di alt nivel, di filosofie, di antropologjie, di estetiche, di gnoseologjie, e di esponi in maniere clare e precise il pinsîr dai plui grancj pensadôrs.
◆ Il libri si pues leilu sicu un manuâl di storie de art, ma ancje di storie de filosofie o fintremai di storie cence nissun complement. Par vie che a son ducj elements che si incrosin fin des primis manifestazions de art primigjenie e che ancjemò in dì di vuê si incrosin.
◆ A son analizadis lis figuris di grancj pitôrs tant che Tintoretto, El Greco, Bosch, Pontormo, Parmigianino, Canaletto, Kandinskij (impussibil citâju ducj) e, cuntun rivuart particolâr, i ‘furlans’ Tiepolo e Carlevaris. Ma cheste storie e je peade a strent cu lis teoriis filosofichis: si fevele di Platon, di Aristotil, di Plotin, di Baumgarten, di Kant, di Hegel, di Vico, di Schopenhauer, di Heidegger. Ognidun di chescj al à vude une sô posizion su lis variis funzions de art, su lis ideis di bielece e di estetiche, sul rapuart jenfri simbul e obiet.
◆ Par antîc, la art e jere peade al util e e veve dispès un valôr cultuâl o fintremai misteric. Dut il contrari dal concet di art pe art, val a dî esentade di ogni forme di util. E si rive al fruçonament che la art e à vût intal Ocident intal ultin secul e mieç (l’espressionisim, il cubisim, il dadaisim, il futurisim, il surealisim, la pop art…). E la mentalitât eurocentriche dal colonialisim e à impedît, par esempli, di capî la art africane che chest fruçonament no lu à patît.
◆ Une trentine di riproduzions fotografichis a judin a capî miôr cierts concets complicâts. ❚