Proibizion di fumâ ancje difûr

Zovins, che di sere si cjatin intai zardinuts, si niçulin sui pindui, a fumin, e canais la dì daspò a vegnin a zuiâ intal mieç des cjichis… Senis cussì a podaressin restâ nome intai ricuarts par vie che la proibizion di fumâ, che in Austrie pal setôr enogastronomic e je stade fate buine “za” intal 2019 (!), e podarès jessi slargjade ai lûcs publics difûr, ven a stâi ai zardinuts e altris spazis vierts là che i fruts a van a zuiâ e i fantacins a passâ cualchi ore. Pes grandis citâts no je une novitât, stant che a Graz e a Viene al è improibît di fumâ intai zardins di zûc, ma cumò si vûl lâ indevant cuntune leç buine par ducj i Länder, leç che, daûr di ce che al dîs il ministeri pe salût, e sarès za in discussion. Si proviodin ancje altris restrizions: e je za in vore di cualchi an la proibizion di fumâ in machine se a son dentri minôrs di 18 agns, ma un doman al sarà l’autist che al scugnarà controlâ il rispiet. E limitazions a varessin di jessi fatis buinis ancje par chei sostitûts dai spagnolets che si cjolin par bocje, sicu chei sacuts che si metin jenfri lavris e zenziis, prodots une vore popolârs e di mode jenfri i zovins e che dut câs a son une vore pericolôs, par vie che al somee che a puartin besvelt ae dipendence. A contegnin nicotine ma no tabac, e si che duncje fin cumò no son subiets a nissun control su cualitât e dosament, robe che za di timp e da lûc a rimarcs. Intal câs dai sacuts si trate di un câs in cressite costante. A vegnin vendûts come alternative plui salutâr dai spagnolets, ma a crein dipendence tant che cualsisei prodot a base di nicotine. Il ministeri de salût al domande alore che ancje chescj prodots a vegnin metûts dentri intes proibizions, cjapant dentri ancje la publicitât.
◆ Dal 2019 si à ancje la proibizion di fumâ intal curtîl des scuelis e si che duncje no si capìs parcè che il fum al varès di jessi permetût intai zardinuts, stant che a son propit i canais e i zovins chei che a frecuentin di plui chestis areis, dutun ancje cul fat che a son propit chei che a àn di jessi plui prudelâts.
◆ In Austrie il fum al è stât limitât dulinvie dai agns e a son rivâts ae misure plui penze, che o vin fevelât disore, dome intal 2019. Par chel, la Austrie e je un dai stâts dal OEEC (Organisation for European Economic Cooperation) là che si fume di plui e che al è sot medie pai agns in salût, e chest ancje se intai ultins agns il numar dai fumadôrs si è sbassât cetant, rivant al 49,1%, di chei che a àn plui di 16 agns, che a disin di no vê mai fumât. La percentuâl plui alte di fumadôrs e tocje i umign jenfri i 30 e i 45 agns e chest si viôt ancje intes statistichis sui tumôrs e su lis malatiis di cûr, de circolazion, de respirazion.
◆ Un cuart di chei che inmò a fumin ogni dì a àn scomençât prime dai 15 agns, ma in dì di vuê al cambie il mût, cul consum di spagnolets eletronics che al è tant che chel di chês tradizionâls e cul aument dai sostitûts.
◆ Cundut che la proibizion resinte inte gastronomie e vedi vût un bon acet de bande de clientele e si vedi marcât un miorament de salût dai dipendents, si stente a lâ plui indevant slargjantle a ducj i edificis publics e aes areis publichis intal viert. Su chest cantin lis discussions intes sedis di guvier a van insot e si pense a une informazion ben spandude su la popolazion par fâ ben acetâ lis gnovis restrizions.
◆ No son stâts inmò dâts timps precîs, ma si previôt che a saran avonde luncs, ancje tignint cont dal fat dai berdeis e des esitancis che si son vûts par dâ dentri lis normis intal setôr gastronomic, che si è rivâts cun vincj agns di ritart su la plui part dai stâts europeans. ❚