Sfuei Mensîl Furlan Indipendent
Archivi de Patrie

CULTURE – Nô i crodìn

............

Il 2009 al è stât un an impuartant pal Friûl: si à fat fieste pai 90 agns de Societât Filologjiche Furlane; a son stâts 10 agns de metude in vore de Leç 482/99 pe tutele des minorancis linguistichis storichis; no par ultin in ordin di impuartance, al è stât il vincjesim cuint de presentazion de Bibie par furlan. Se o pensìn a dutis lis traduzions dal libri plui impuartant de cristianitât, nus salte subit tai voi che chest lavôr nol è stât fat di ducj, che nol è stât tradusût in dutis lis lenghis des popolazions di fede cristiane; ma par furlan sì. O vin di pensâ a chest travuart come une ulteriôr legjitimazion de nestre identitât culturâl e linguistiche, une opare puartade a compiment pe iniziative editoriâl di Mario Ribis, ma soredut graciis a dôs personis che a crodevin une vore al messaç che cheste opare e varès puartât cun se al popul furlan. Un messaç sedi cristian, pe difusion de peraule di Diu, sedi di cussience de nestre identitât.
La zornade che il president de provincie Pieri Fontanin al à volude ai 13 di Novembar a palaç Belgrât e testemonee la ricognossince dal popul furlan pal impuartant lavôr che pre Checo Placerean e pre Antoni Beline a àn puartât indevant: cuasi une mission, o podaressin dî.
E propit il president Fontanin al à vierte la ricorince ribatint il valôr di cheste zornade, vignude intun moment di inciertece e di inutilitât de crôs, dulà che si stan pardabon pierdint ducj i riferiments culturâi e religjôs. Dongje di lui e ai bonsignôrs Brollo e Battisti, al jere ancje il gnûf vescul de arcidiocesi di Udin, bonsignôr Andrea Bruno Mazzocato, che ducj a spietavin di sintî: nol à delududis lis spietis di chei che lu scoltavin, disint che la identitât furlane e je di tignî cont e insiorâ. E al à ancje dite: «Che la Bibie par furlan e vignedi doprade, e se scrite in marilenghe e pues judâ a leile e meditâle miôr». Al è intervignût ancje il president de Agjenzie regjonâl pe lenghe furlane Lorenzo Zanon, marcjant il merit di pre Checo e pre Antoni di vê contribuît al ricognossiment di noaltris furlans come popul vêr e propri; cun di plui, al à spiegât ancje la impuartance pe nestre tiere di vê plui minorancis linguistichis, parcè che, al à dit: «La specialitât de nestre regjon e je dade propit di chest: se noaltris o pierdìn cheste ricjece di multiculturalitât o deventarìn une banâl regjon ordenarie, cun ducj i aspiets economics a chest peâts».
Dopo altris intervents, al à sierât l’incuintri pre Tonin Cappellari, plevan di Ruvigne, cuntun intervent dal titul «No crodevin in lui», riflession gjavade fûr dal Vanzeli di Zuan, par spiegâ la fadie che al à fat il popul furlan, e in particolâr chei oms di glesie, che a àn cirût di no fâsi pestâ i pîts dai sorestants, ma che a àn fat di dut par otignî une dignitât tant che popul cuntune sô storie, che come int che e pues vantâ une sô culture e une sô identitât. Chest un dai passaçs: «O scugnìn acetâ che la peraule di Diu par furlan e je cressude come che al dîs il profete Isaie: tant che une lidrîs che e salte fûr de tiere arsinide (Is 53,2) intune societât e glesie che, par tancj motîfs, no i crodevin».
Venusia Dominici

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +