Fieste analcoliche a Tor di Zuin

Une sfide nus ven intant di chest Istat dai organizadôrs de fieste “Perdon dal Tor” a Tor di Zuin che si davuelzarà dai 15 ai 17 di Avost: une fieste cence alcol!
Il prin sintiment al è di curiositât par une sfide coragjose. Sbaliât pensâ a un discors proibizionistic, cui che al vûl bevi a ogni cost al pues lâ di un altre bande cence problemis, la fieste e sarà dome divertiment, cence predicjis e discors. Par tornâ a cjapâ sù il gust di divertîsi, di scoltâ musiche e fâ fieste. O pûr aromai si vadial a une fieste dome par incjocâsi?
Tancj chei che a dubitin dal progjet par difarentis motivazions: une fieste cence alcol no varà zovins, cence alcol no si divertissisi, sbaliât improibî un prodot dal teritori invezit di fâlu cognossi e valorizâlu.
NUMARS IN CRESSITE_ Ma alore se la idee e je cussì sbaliade, parcè tai ultins agns ator pe Italie fiestis cence alcol a deventin simpri plui frecuentis? Pal passât a Mantue, a Levico, a Imer in Valsugane ai 2 di Jugn, a Parme ai 11 di Jugn, a Piombino ai 10 di Avost (dopo dut cumbinade cun musiche rock) e tantis altris plui o mancul publicizadis. Se la idee e fos stade negative no larès slargiantsi… Al covente a pôc che magari jenfri une sagre a sedin spazis e riunions sul abûs dal alcol e sul disasi dai zovins, se il comitât organizadôr nol à pensât a atrativis, oltri l’alcol, a la altece di une fieste…
VALORIZAZION DAI SAVÔRS_ Nol è cuntune fieste dal vin o de bire che si valorize il prodot di un teritori, come il vin furlan, ma tornant a lavorâ varietâts autoctonis, fasint prodots di cualitât par fâ capî il lavôr e la fadie che a son daûr di ogni butilie, la impuartance dal teritori (un merlot prodot sui Cuei Orientâi dal Friûl nol è compagnn di un prodot de zone di Lison-Pramaiôr o de zone de Grave), il gust di cirî profums e savôrs particolârs intune tace di vin.
La culture dal vin no je bevi vin dome par incjocâsi, par lâ a svantâsi di jessi stât cjoc aromai tantis voltis, come se si ves di bati un record mondiâl.
UN AUGURI_ La uniche pôre? Che i organizadôrs si sintin dibessoi, come pierlis raris, cjalâts come marzians, sconfits dome par no rivâ a coinvolzi il paîs dongje. Forsit alore sfrutant la globalizazion si podarès fâ un pat di amicizie e colaborazion cun fiestis plui lontanis come distance ma dongje come idee.
La fieste di Tor di Zuin e podarès sedi il prin anel di une cjadene cun altris “sagris cence alcol” ator pe Italie e pe Europe, parcè che une fieste doprade par gambiâ lis robis e je simpri un bon scomençâ.