Slovenie ae vuide de Union europeane, ma malsigure dal propri destin

Te seconde metât dal 2021 la Slovenie e à la presidence de Union europeane, ma tal Stât belzà si cjale al 2022, cuant daûr lis previsions a saran lis elezions politichis e si votarà il parlament te sô gnove composizion. Pal moment la sene politiche slovene e va indenant a jessi avonde polarizade.
◆ A un incuintri dal so partît, il Partît democratic sloven, inmaneât ale fin di Avost a Leskovec, il premier Janez Janša al à dit che par so cont a an di jessi in prin plan i intares dai slovens; par chest tal futûr no si vares di cjacarâ di confins vierts e coridôrs pai migrants.
◆ O ricuardin che il partît Slovenska demokratska stranka al è espression dal centridiestre sloven e che in chest moment al è l’azionist plui fuart te coalizion di guvier, dongje i democristians di Gnove Slovenie (Nova Slovenija) e i liberâi dal Partît dal centri moderni (Stranka modernega centra). Il guvier al è di minorance dale fin dal 2020 – di cuant che de coalizion al è jessût il Partît democratic dai pensionâts di Slovenie (Demokratična stranka upokojencev Slovenije), di centri.
◆ Al incuintri a Leskovec Janša al à ancje declarât publicamentri lis condizions che lu viodaressin intune gnove coalizion di guvier daspò lis prossimis elezions.
◆ Prin di dut Janša al à dit che si spete un sevêr rispiet de costituzion slovene, ma ancje che i partîts che a vessin di colaborâ cul so a declarassin prime che a sostegnaran la risoluzion dal Parlament european che e condane i regjims totalitaris.
◆ Ancje in Slovenie une part dai citadins no vûl vacinâsi cuintri dal Covid-19 e Janša al à fat savê che al sarà plui difizil scoltâ cui che nol cjape sul seri lis prescrizions par prevignî la pandemie. Al à ricuardât la responsabilitât che ognidun al à pal prossim, parcé che secont di lui par vie di chestis personis a murin o si inmalin altris.
◆ No son mancjâts atacs ale oposizion, che par Janša tai agns stâts no vares lavorât avonde, straçant distes bêçs.
◆ Clâr che lis declarazions a an discjadenât une sdrume di reazions di ogni bande, dutcâs cence gambiâ nuie te sene politiche slovene. Difat si son dome confermâts i doi schiriaments che si cognossin tai ultins agns – chel di centridiestre e chel di centriçampe, cul Partît dai pensionâts ae oposizion ma pal moment no insiemit ai partîts di centriçampe e inmò cualchi partît plui piçul e i deputâts des minorancis taliane e ongjarese a fâ i jolly. ❚