Fûr i furlans di Pordenon

Cuntune sielte une vore grivie, il Consei comunâl di Pordenon al à fate buine une delibare li che si domande di jessi gjavâts fûr de aree definide furlanofone daûr de gnove leç regjonâl 32 sul furlan.
La decision e je stade cjapade dute di presse di une setemane a chê altre daûr dal sburt dal sindic di divignice venite Sergio Bolzonello. Presse assurde ancje parcè che la gnove leç e je ferme in spiete dal pronunciament de Cort Costituzionâl. Cun di plui Pordenon nol à mai domandât uficialmentri di jentrâ te aree, pur vint usufruît di contribûts pal furlan, duncje la facende no je stade discutude nancje in passât.
SCJAFOIÂ LA CUESTION FURLANE_ E cussì di une cuestion tant impuartant si à fevelât nome dopo de aprovazion de delibare e cul solit dibatit puar e plen di disinformazion che al seguìs par solits a decisions sul furlan. Ma forsit la intenzion e jere propit cheste: tignî platade la cuestion furlane a Pordenon par podê scjafoiâle.
La sielte, cun di plui, e pant une grande provincialitât, che a patissin un tic ducj i cjaflûcs de Patrie che a cirin di dâsi une dignitât no infuarcint lis lôr lidrîs, ma cirint di dineâlis. Une tindince pardabon assurde che e mertarès dai aprofondiments psico-sociologjics. No je une robe dome de citât naoniane, si intint, anzit: par fâ un esempli di une zone che nancje Bolzonello al metarès dubi che sedi furlanofone, al sucêt ancje a Tumieç. Par dî la veretât Udin al à dât un tic une svolte a cheste situazion, tacade cul sindic Cecot e cumò cun Honsell, che al somee pontâ a jessi finalmentri riferiment dal teritori dulintor e no element stacât e snobistic. Ancje a Gurize si torne a valorizâ lis lidrîs furlanis, finalmentri.
INDAÛR E PROVINCIÂL_ Pordenon al reste indaûr a 15 agns za fa, cuant che, provincialmentri apont, si vergognavisi de lenghe furlane. Come che al à sostignût cualchidun, po stai che no si feveli plui il dialet dal furlan che si fevelavilu te fin Votcent, cuant che al jere une vile di 9000 di lôr. Ma il furlan lu fevelin tancj di chei che a lavorin e che a son a stâ li (ancje in consei comunâl!) e che a àn fate grande Pordenon, anzit che a costituissin la fonde de citât.
Une citât che e devente grande e e je simpri misture di int, si capìs, e di fat al è un element di fuarce e vivarositât. Propit in chei dîs ca e je in pît une polemiche a proposit 600 milions di euro domandâts dal Comun ae Regjon par fâ sù un centri de glesie evangjeliche, o che si pensave destinâts a un centri islamic. Che a sedin bêçs par chei o chei altris, par lôr si spindin – just – par judâ la integrazion, e invezit pe comunitât furlane no? Si da acet – sacrosant – ai gnûfs citadins e nome i furlans, che a son stâts e che a lavorin li di simpri, che a son il clap che parsore i è stât fat Pordenon, si ju pare fûr e si dinee la lôr esistence?
LA PROMOZION E VARÈS DI VIGNÎ DI DUCJ_ Seguî la gnove leç 29 pal furlan nol vûl dî imponilu, ma dâ la pussibilitât di praticâlu e soredut rispietâlu e rispietâ ce che al conte: un popul e une tiere. Chest al varès di jessi ancje l’obietîf di chei furlans che no lu fevelin, chei che Bolzonello al cîr di fâju calcolâ tant che venits. In Irlande, l’irlandês al è fevelât dal 10% de popolazion, ma daûr dal articul 8 de lôr costituzion al è la “principâl lenghe uficiâl”.
Al ven insegnât par dute la Irlande che le maiorance e je inglesofone, e la Eire lu à fat fâ bon tant che lenghe uficiâl de Union Europeane.
Su dute la isole lis indicazions stradâls e i nons des viis a son bilengâi, par inglês e irlandês.
A san che al è un element fondant dal lôr jessi irlandês. «Il probleme al è se ca di vincj agns al sarà ancjemò un Friûl che nol sedi dome une espression gjeografiche» al diseve Fausto Schiavi te frase che o ripuartìn ancje in ultime pagjine. La decision di Pordenon e pant une intenzion ancjemò plui penze, dî che Pordenon nol è Friûl : une altre dimostrazion che cence il furlan il Friûl nol va di nissune bande, ma lu fasaran disparî ancje des cjartis gjeografichis!
UNE CUESTION NO DOME LINGUISTICHE_La cuestion no je dome di lenghe, di fat: chei che no son pal furlan no son nancje pal Friûl. La decision a Pordenon e je stade cjapade di drete e çampe insiemit, pronts a svendi une robe che a lôr ur somee acessorie, se no inutil: la furlanetât. La politiche furlaniste e costruìs specialitât, universitât dal Friûl, gjestion dal taramot, tutele dal ambient. La politiche di chei cuintri de furlanetât e prodûs decisions di presse e di scuindon parsore dal cjâf dai furlans, Tav che e taie la planure furlane e che par fuarce e à di passâ a Triest cuntun percors antieconomic, politichis debilis (o miôr no politichis) su la imigrazion, nissun parlamentâr furlan tai doi ultins guviers ni di çampe ni di drete, servitûts militârs e vie indenant…