Al torne “Risonanze”, il festival dal “len che al sune”

La “ripartence” e partìs de mont: Malborghet
al programe la manifestazion dai 17 ai 20 di Jugn
Cirî il talent e la bielece al è plui facil tal mieç dai boscs de Valcjanâl, che par un fin di setemane a deventin salis di conciert, metint dongje art e turisim esperienziâl. E je la mission di “Risonanze”, une rassegne che e puarte ae scuvierte di un cjanton di confin dulà che trê culturis si dan la man e si fevelin in musiche. Une musiche che e ven dai struments fats cul “len che al sune”, e che al prodûs imprescj bogns di incjantâ cui che al scolte lis  lôr melodiis. E mai come cumò, ae fin (sperìn) di un moment tant dificil par dut il mont, chê musiche e pues coventâ ancje in clâf di rigjenerazion.
◆ La fuarce di cheste manifestazion, che e je cressude intai agns daûr de iniziative dal diretôr artistic Alberto Busettini, e fâs deventâ par cuatri dîs chest paîs di frontiere cu la Austrie e la Slovenie une oasi fûr dal timp. Chest an, par judâ cui che al rive a Malborghet a inneâsi intune atmosfere magjiche, si cjalarà in direzion di Viene cun grancj concierts, une mostre dedicade a Sissi, ativitâts pai fruts e pes fameis, e ancje escursions te nature alpine di une bande, e te enogastronomie imperiâl di chê altre.
◆ La organizazion e curarà la sigurece al massim nivel. Ducj i events e lis ativitâts a saran organizadis cu la prenotazion obligatorie online. Ma i progrès de campagne di vacinazion a permetin di tornâ a gjoldi di culture, musiche, nature cun ospits di grant nivel tant che i Wiener Sängerknaben, piçui cjantôrs di Viene, che a saran sabide ai 19 in Val ‘Saisare e domenie ai 20 a Lignan, e la FVG Orchestra, vuidade de bachete di Vinzenz Praxmarer, che e puartarà tal mont dai valzers e des polchis di Strauss pari e fi.
◆ Informazions sul festival ‘Risonanze’ si cjatin sul sît www.risonanzefestival.com o su la pagjine Facebook ❚
Redazion