Cors e regulis strentis pe integrazion dai migrants

Scrusignant jenfri gjornâi e notiziaris austriacs in rêt, mi soi intopade intune notizie di agjenzie no masse lungje e une vore resinte – dai 13 di Avost passâts – dade fûr suntun dai mensîi di atualitât politiche di plui grande tiradure a nivel nazionâl. O ai pensât ben di fândi un struc, stant che al è un cantin cetant atuâl ancje intes nestris realtâts regjonâls e nazionâl e – robe par me fondamentâl di cuant che o scrîf par chest gjornâl – cence sfuarçaduris ideologjichis politichis di cualsisei tindince, ma dal sigûr – secont la mê opinion – super partes.
◆ Chest al è impuartant massime in moments dificii o intrigôs dal pont di viste politic, come chei che nô e i nestris convicins o stin passant bielzà di plusôrs agns. Al è inmò plui impuartant cuant che l’argoment al cjape dentri mûts di fâ, ideologjiis, sintiments che a van putrop di là de politiche e si che duncje al è une vore malvualîf.
O fevelarai di migrants: no lu ai mai fat par dret fin cumò, juste ben par sghindâ interpretazions ideologjichis. Cheste notizie mi somee però zovevule tant che sugjeriment di riflession par ducj, di cualsisei part politiche.
◆ Dal 2017 in Austrie ducj chei che a àn il titul di “rifugjât” o ben di “beneficiari di protezion sussidiarie” a scuegnin firmâ un acuardi di integrazion. Cussì si impegnin a frecuentâ i cors di lenghe todescje, che par altri a esistin bielzà e che a previodin un esam finâl obligatori par ducj chei che a vuelin fermâsi e lavorâ sul teritori austriac. Cun di plui – e cheste e je la part pardabon gnove – a seguî “cors sui valôrs”. Il Font Austriac pe Integrazion (ÖIF), che al saponte e al supervisione chescj cors, al spieghe che a coventin par imparâ lis regulis plui impuartantis pe convivence sociâl in Austrie. Intal program, di fat, a son cjapâts dentri temis di grant pês par ognidun – soredut par chei che a vegnin di puescj là che no si cognossin ni pôc ni trop – sicu la paritât fra om e femine, il concet di democrazie, il principi di legalitât; a dut chest, si zontin ancje notiziis su la vite di ogni dì, tant che il sisteme scolastic e chel sanitari, il funzionament dai ospedâi, il rapuart cu lis istituzions, lis domandis e la compilazion di documents, par rivâ fin aes regulis su la racuelte dai refudums.
◆ Par cumò, ogni rifugjât al à un oblic di frecuence di vot oris, ma de prossime Sierade a saran cetant incressudis, cu la introduzion di altris modui didatics obligatoris, che a tocjaran il mût par fâ une domande di assunzion, ma ancje visitis vuidadis a datôrs di lavôr. Cun di plui in chescj cors, par fâ cognossi i valôrs sociâi, si batarà dûr su la oportunitât par ognidun di impegnâsi intal volontariât, che ben si intint tant che prestazion sociâl sore nuie, cun chê che “dâ e vê” e podedi lâ a pro dal ben di ducj.
◆ A chei che a ciraran di sghindâ i cors ur saran ridusudis cetant lis indenitâts sociâls, salacor ancje chês minimis. Il procès di integrazion di ognidun al vignarà marcât e controlât in maniere continue midiant di une “bancje di dâts pe integrazion”, colegade cui Länder federâi e cui uficis locâi dal lavôr (AMS). ❚