Cemût che la tecnologjie e cambie il nestri mût di fâ e di pensâ

Lis tecnologjiis, soredut te comunicazion, a àn il podê di rindisi invisibilis: cori lis notifichis di WhatsApp, consultâ in mût meticolôs i inzornaments dai nestris contats di Facebook o Instagram a son azions automatics, come che al jere fin a cualchi deceni indaûr lâ in edicule a buinore a cjoli il gjornâl o impiâ la radio par scoltâ lis ultimis notiziis. La tecnologjie e devente cussì une seconde nature, part integrante dal nestri mût di vivi, come che al note Massimiano Bucchi, professôr ordenari di Sience, Tecnologjie e Societât te Universitât di Trent, tal so “Io e Tech: Piccoli esercizi di tecnologia” (Bompiani, 128 pagj., 12 euros).
◆ II studiôs dai media Marshall McLuhan al evoche su chest il mît di Narcîs, insensibil al amôr, che al fo cjastiât de dee Nemesi che lu fasè inamorâ de sô imagjin che si rifleteve intun spieli di aghe; al murì consumât di cheste passion inutile, mudantsi inte omonime rose. Te stesse maniere, nô si cjalìn tal spieli dai social media, dismenteantsi che a son il prodot di nestris sieltis no cussientis, e di sieltis di altris, une vore cussientis.
◆ Al covente osservât il mît cun atenzion par marcâ lis analogjiis cul dì di vuê; il tiermin ‘narcîs’ al derive dal grêc nark-, e dal verp narkao, che al vûl dî ‘infurmiâsi, inçussîsi’. Narcîs si piert te contemplazion di se stes, la cussience e va al mancul e a vinci e je dome la fantasime di une chimere: il cuarp al crôt a ce che al è dome une ilusion.
◆ Il mît nus ricuarde che plui o sin concentrâts suntun ogjet – Narcîs par chest si jere dismenteât dal mont – plui o sin inçussîts rispiet aes resons dal parcè che lu doprìn e ae maniere cemût che al cambie il nestri mût di fâ e di pensâ. Il studiôs Langdon Winner lu definìs sonambulisim tecnologjic.
◆ Cemût sveâsi? Narcîs si dismôf fasintsi domandis, fin cuant che al jes dal ingjan. Bucchi nus invide a meti in discussion i lûcs comuns, come la crodince che la tecnologjie e sedi neutrâl, o buine o triste. Al pree di no inzenoglâsi denant de retoriche de inovazion, che e viôt dut ce che al è tecnologjie tant che indiscutibilmentri positîf, come il ‘cjamp dai miracui’ di Pinocchio, là che semenâ cuatri carantans a ‘nt fâs cjapâ sù miârs tal indoman. Ma bisugne sghindâ ancje la trapule de nostalgjie, parcè che no si à di idealizâ il rapuart cu lis tecnologjiis dal passât.
◆ “Io e Tech” al è un test svelt e cun provocazions inteligjentis, conseât a ducj chei che si sfuarcin di butâ il voli, in maniere atente, su la contemporaneitât. Mestris e gjenitôrs a varessin di leilu par vuidâ i zovins tal lôr viaç te jungle de tecnologjie. ❚