Giangiacomo Vale,
Una e diversa.
L’Europa di Denis de Rougemont,
Mimesis, Milan/Udin, 2017
Denis de Rougemont, svuizar di lenghe francese, al è stât un filosof une vore impuartant, che vie pal Nûfcent al à studiât, pensât e scrit soredut in cont dai rapuarts tra individuis, tra individuis e coletivitâts e tra coletivitâts diferentis. Al centri dal so pinsîr e je la idee federâl e federaliste, che al à disvilupât in direzions diferentis, ma simpri cun chê di tignî dongje in maniere positive la unitât e la diversitât. Par cognossi la sô vision dal mont, la sô cussience de pluralitât no jerarchiche di apartignincis e di identitâts, la sô atenzion pes personis e pes comunitâts e la sô idee di unitât europeane, al merete, let il libri “Una e diversa. L’Europa di Denis de Rougemont”.
Il so autôr, il furlan Giangiacomo Vale, ricercjadôr in Filosofie politiche, al presente in maniere organiche e sintetiche i ponts di fonde dal pinsîr dal filosof nassût tal Cjanton di Neuchâtel, dal so federalisim democratic e ecologjic che al nas e si disvilupe dal bas, e che si fonde su lis personis e su lis comunitâts. ❚
Marco Stolfo
