CURTIS E CHE SI TOCJIN. Partîts masse «romanocentrics»

I doi partîts plui grues di chenti e di Italie, prin chel di çampe e po dopo chel di drete, si preparin a tignî i lôr congrès costitutîfs in Friûl. Cun chestis notis, o volaressin palesâ il nestri pensîr a chei personaçs che si presentaran par jessi i lôr esponents di prime e di seconde file. Noaltris, che o sin de schirie vecje e gnove dal autonomisim furlan e che o vin ancje dât une drete e un contribût concret ai partîts di une volte a impegnâsi pal Friûl achì e a Rome, o bramaressin un grum che ancje i gnûfs politics di vuê si visassin simpri di jessi furlans, tal sens di identificâsi cu la cuestion furlane e di puartâle indevant. Magari – se propit no vuelin sameâ masse «localiscj» – insiemit aes grandis cuestions di nivel nazionâl e european.
Prin di dut, a chest fin, al è indispensabil che a metin in pîts gnûfs partîts federâts cun Rome e no, come vuê, sotans dal centralisim roman che al decît dut, sedi cui puartâ tal Parlament talian, che in chel european, sedi cui che al à di vê lis incarghis plui impuartantis tai partîts, te Regjon,tai Ents locâi. Chestis decisions a àn di jessi cjapadis achì, in Friûl, e no fûr de nestre tiere, a Rome o a Triest. E no dome su lis incarghis ma ancje su ce che al rivuarde il Friûl e il so popul. Il federalisim dal Friûl nol à di jessi dome cun Rome, ma ancje cul nivel regjonâl, vâl a dî cun Triest. O bramaressin, daspò, che lis resonadis tra i diviers candidâts dai partîts, e tra i doi partîts in disfide, a fossin une gare no dome sui nons, su lis scuadris, sui programs gjenerâi, ma che a dessin ancje une rilevance fuarte aes cuestions dal Friûl, di puartâ indenant achì ma ancje a Rome e tal Parlament european.
Si riferìn ae valorizazion de identitât furlane e plurietniche de nestre int e, si che duncje, de specialitât intocjabile dal Statût de Regjon e de autonomie de Universitât dal Friûl. Si riferìn ae plene e largje metude in vore de legjislazion pe pupilance des minorancis linguistichis, cun fuarts intervents positîfs sedi dal Stât talian, che de Union europeane e dal so Parlament, che de nestre Regjon. Cussì e à di jessi valorizade – e no ignorade come che al sucêt cumò – la Comunitât des Provinciis furlanis che, pûr tal stâ insiemit dal Friûl cun Triest, e à di puartâ indenant la coesion e l’unitât dal Friûl e che à di jessi in stât di otignî podês e mieçs finanziaris de Regjon, dal Stât talian, de Union europeane, par meti in vore – ancje par vignî fûr de crisi economiche – progjets pal disvilup economic, sociâl e culturâl di dut il Friûl. Par chest ultin fin, i doi grancj partîts a varessin di meti in vore il decentrament de Regjon a Comuns e Provinciis, plui voltis proclamât ma mai ativât par no molâ il centralisim clientelâr. Anzit: cul disfâ lis Comunitâts montanis, si ziruche, propit cuant che la int de mont e la Glesie furlane a domandin intervents di svilup e di autoguvier .
Infin, par puartâ indenant al miôr i rapuarts dal Friûl e di Triest cul centri ecul est de Europe, bisugne frontâ tai fats e cence lâ a cirî scuintris cu la int, la realizazion des grandis infrastruturis. Si riferìn al Curidôr 5 che al pues passâ benon, e cence cumbinâ disastris, par Gurize e la val dal Vipau. Al Curidôr dal mâr Adriatic al mâr Baltic che al pues passâ di Pordenon, a Udin, a Tarvis, di lunc la ferade Pontebane, ma si riferìn ancje al modernament de dorsâl stradâl di Gurize, a Udin, a Pordenon, di valôr strategjic pe economie e i trafics dal Friûl intîr. Cussì come che no si dismentein  dal rilanç de funzion internazionâl dal puart di Triest, tai rapuarts tra la Asie, l’Orient di Mieç e la Europe, pal avignî di chê citât e de sô int.
Pe soluzion di chestis cuestions dal Friûl di vuê – e altris ancjemò – si à di tignî presint la funzion dai partîts e dai lôr esponents politics di chenti. Curtis e che si tocjin: lu savarano fâ? O i furlans varano di pensâ a gnovis rapresentancis?
ARNALT BARACÊT