I COLÔRS E LIS FORMIS DE STORIE: UN VIAÇ INTE ART DAL FRIÛL. Di Napoleon al Congrès di Viene. La storie de statue dismenteade

Ce vuelial dî colâ dentri di un cuadri, esplorâ lis penombris di un afresc, fâ vivi une statue, sintî ce che nus conte une ancone, une miniature, une stampe? Cheste rubriche e puarte ae scuvierte des oparis di art che e je siore la Patrie, ma lis conte dal didentri, cu la vôs dai lôr protagoniscj, intun zûc gnûf e intrigant.
Le opare e veve di jessi sculpide par volê di Napoleon. La idee origjinâl e jere che di poiâle suntun basament a forme di piramide tal mieç de place di Cjampfuarmit par memoreâ il famôs tratât di pâs dai 17 di Otubar dal 1797. Ma la Storie, cui siei cors e ricors, e fasè colâ la armade francese cambiant la sô direzion, cussì la opare e fo dal principi abandonade intun curtîl privât, simpri a Cjampfuarmit. Tal 1819, l’imperadôr asburgjic Francesc I al volè regalâle ae citât di Udin cuntune cerimonie di impat straordenari. E là che e fo poiade, ancje in dì di vuê si pues viodile in dute la sô simbologjie e grandece.
Il progjet origjinâl al jere stât assegnât al scultôr lombart Zuan Batiste Comolli (1775-1831) ai 30 di Zenâr dal 1811, nuie di mancul che dal Vicerè Eugenio di Beauharnais, che al veve personalmentri inmaneade une schirie di events a dîs agns de firme di Cjampfuarmit. Daûr de idee di Comolli, lis autoritâts a assegnarin al furlan Michêl Zuliani (1778-1813), cognossût ancje tant che il Lessan, il compit di meti adun un basament imponent e plen di simbui che a evocavin la potence imperiâl. Ma i lavôrs si strissinin, tant che la statue e rivarà a Cjampfuarmit dome tal 1813. Masse tart, dal moment che intun an Napoleon, za tibiât in Russie, al sbrissarà pierdint la vuere e al vignarà impresonât inte Isule di Elbe. Tal 1814 al tacarà il Congrès di Viene, là che l’orloi de Storie al vignarà tirat indaûr di almancul un centenâr di agns. Nissune maravee duncje che la opare, aromai considerade fûr timp, e vignìs scuindude e po dopo dismenteade. Ma si sa che i simbui a puedin simpri jessi interpretâts, massime se a son metûts insiemi intune forme preziose e biele. Cussì, ae fin, pe zentîl contribuzion dal cont Jacum Rota, si cjatin i bêçs par puartâle a Udin, come rapresentazion di chê union e armonie che propit il Congrès di Viene al declarave di volê garantî a ducj i popui europeans.
Valantin Presani (1788-1861), arlêf dal Zuliani, al studie il progjet di colocament: dôs rampis di scjalis curvadis suntune linie taronde che a varessin unide la place ae rive dal Cjistiel. La iscrizion e fo sugjeride invezit di Antoni Morcelli: dute la simbologjie origjinâl e jere voltade su la mission che la Corone asburgjiche e steve pandint. E il regâl al vignive firmât no plui di Napoleon, aromai destinât a Sant’Elena, ma di Francesc I di Viene. Come che al diseve chel: cambiâ dut par no cambiâ nuie. La tradizion popolâr, intai agns, e batià la statue cul non di Marie Luise. Ai fruts si ur diseve che par jentrâ a Udin la prime volte, bisugnave lâ a bussâi il cûl. ❚
Agnul Floramo